Medvitslaus person redda opp frå vatnet etter redningsaksjon

Alle involverte skal vere ute av vatnet. To vert sett til av helsepersonell.

Søndag ettermiddag meldte politi og brannvesen om at eit barn hamna i vatnet utanfor Sandvehamn nord for Skudeneshavn i Rogaland.

Ifølge politiet er det er ein moglegheit for at sjøen har slått innover moloen og dratt barnet ut i vatnet. Ein voksen person skal etter det ha hoppa uti vatnet og forsøkt å redda barnet.

– Det var veldig sterk straum og store bølger, seier innsatsleiar i Sør-Vest politidistrikt, Fritz Arne Lilleskog, til NRK.

Surfarar i nærleiken hjalp dei to som var i vatnet med å komma opp.

Personen som først trong redning var ein gut. Barnet var medviten og blei frakta til sjukehus med ambulanse.

Etter det skal nokre av dei som dreiv redning sjølv ha hatt behov for hjelp.

Redningshelikopter var på staden og redda opp ein medvitslaus person. Personen vert frakta til Haukeland universitetssjukehus.

Fem personar skal ha vore i vatnet, fire som dreiv redning og ein vaksen person som var medvitslaus.

Fleire av desse skal ha vore nett dei surfarane som bidrog til redninga av barnet.

Like før klokken 13.00 meldte politiet at det var ingen fleire personar i vatnet.

Politiet prøver nå å kartleggje hendinga og å finne ut kva som skjedde.

Mange involverte

Hovudredningssentralen meldte klokka 13.15 om at mange var involverte i hendinga.

– Det er veldig vanskelege forhold i området med stor sjø, seier Per Hognaland, redningsleiar ved Hovudredningssentralen Sør-Noreg.

Fleire personar hoppa i vatnet for å hjelpe barnet som først trong hjelp.

Deretter skal redningshelikopter frå Sola, Luftambulansen, helsepersonell, brannvesen, politi, Redningsskøyta og Røde Kors ha delteke i aksjonen.

Statusen til dei redda personane er enno ukjend.