I Oslo fjerna eit politisk fleirtal med MDG i spissen, 767 kommunale parkeringsplassar i sentrum i 2018. I 2019 har dei fjerna minst 4000.
I Bergen har MDG planar om å fjerna fleire tusen.
Men i Stavanger, har ikkje MDG slike planar, ifølge nummer to på vallista, Rune Askeland.
– Nei, me skal ikkje innføra ei radikal omlegging og ta vekk massevis av p-plassar, seier han.
Det forstår ikkje partiet Venstre, noko særleg av.
Forklaringa må vera at MDG i Stavanger ikkje har fått gjennomslag i samarbeidet med Folkeaksjonen mot bompengar, Raudt, SV, Ap og Senterpartiet, meiner Venstre sin gruppeleiar, Jan Erik Søndeland.
– Dette er heilt nye tonar frå MDG. Det må vera den nye koalisjonen som snakkar og ikkje partiet slik eg kjenner det, seier han.
MDG er ikkje lengre åleine
I valkampen hausten 2019, snakka MDG i Stavanger mykje om at byen skulle bli grønare, dersom partiet kom i posisjon.
– Det vil bli meir fokus på menneske. Og det blir meir fokus på klima og miljø, sjølvsagt, sa førstekandidaten Daria Maria Johnsen.
Men etter at partiet har fått styringsansvar har tonen blitt annleis, i alle fall når det handlar om å fjerne parkeringsplassar frå byromma.
– Det er ikkje slik at me går rundt og set eit stort raudt kryss over alle parkeringsplassar, på ingen måte, lovar leiar i utval for Miljø og utbygging, Rune Askeland.
Fleire grøne byrom
Stavanger kommune skal ruste opp mange byrom i sentrum, for å gjera byen trivelegare å vera i.
– Byromsplanen tar sikte på å gjera byromma grønare, slik at dei får meir preg av park eller leikeplassar, seier prosjektleiar Claus Petersen i Stavanger kommune.
Han meiner at attraktive byrom gir attraktive byar, noko som er viktig for både turistar, kundar på shopping og for dei som bur i sentrum.
Peikar på Oslo
Rune Askeland i MDG meiner den nye koalisjonen likevel gjer sitt for å få eit meir miljøvenleg sentrum i Stavanger.
– Det er tatt grep i Oslo, og kanskje meir radikale grep enn her, men me er også på veg, blant anna ved å gjera fleire bygater om til gågater, seier Askeland.
Det gjer lite inntrykk på Venstre sin gruppeleiar, som tenkjer tilbake på kva MDG sa i valkampen, før dei gjekk inn i styringssamarbeidet med blant andre Folkeaksjonen mot bompengar.
– Viss me kan få nokre grøne område i byen, på kostnad av parkeringsplassar, så må det vera ein god, grøn politikk, seier Søndeland.