400 kroner i straum og 6–700 kroner i nettleige.
Det var det Marius Nesvold Saurdal betalte då straumen var som dyrast i Sør-Noreg i september i år.
Straumprisane har i haust vore 50 prosent høgare enn normalt dei siste fem åra. Det kan verte ein dyr straumvinter, mellom anna grunna nær historisk låg vasstand i kraftmagasina i Sør-Noreg.
Men dette betyr ikkje like mykje for Saurdal si lommebok.
Han produserer straum og varme med solenergi og lagrar alt i ein batteribank i kjellaren.
Det han ikkje får plass til eller brukar sjølv, sel han til kraftselskapet so naboane kan bruke straumen hans.
Han seier tre-fire timar med sol om føremiddagen er nok til å drive heile huset hans gratis gjennom dagen og kvelden.
– Og då brukar eg sveiseapparat og komfyr og alt. Vi sparar ikkje på noko straum i dette huset. Det gjer vi berre ikkje, seier Saurdal.
- Les også: Nær historisk bunnivå i kraftmagasinene
Solutvinning her og solutvinning der
Men det skal meir til enn eit einskild panel på taket for å få til det Saurdal driv med.
Heile taket på huset hans er solcellepanel. Han har ikkje takstein eller plater, men panela held taket tett.
I tillegg har han vertikale panel på nabohuset, der mor hans bur. Desse gjev ekstra straum i dårleg vêr.
– Om vinteren får ein mykje meir ut av energien so lenge dei heng beint. Panela på taket produserer også bra, men den vinkelen her er best på vinteren, for sola står mykje lågare, seier Saurdal.
Han skaffar også varmvatn frå sola med solfangarar – ei løysing der speglar konsentrerer sollys på røyr med vatn som går inn i ein stor varmtvasstank.
– Med eit lite solgløtt får ein like rundt 90 grader varmt vatn, seier Saurdal.
På sida av kvar av solfangarane er det ein aluminiumsgardin som automatisk vil trekke framføre om det vert for varmt – elles kan ein kome til å koke varmtvasstanken.
Alt har ein pris
Men det er ikkje slik at kven som helst kan få til det Saurdal har gjort i ein fei når straumprisen går opp.
– Det er jo ei investering, dette her. Kor mykje har du lagt ned i prosjektet?
– Nei, med heile varmeanlegget i huset – med røyr i golvet, solceller, solfangarar og alt – har vi vel lagt i 700.000, godt og vel. Og då er det utan mine timar, og der er det jo mange.
– Det er ikkje ein heilt billig inngangsbillett. Kan ein setje opp noko slikt utan erfaring?
– Nei, det er det jo ikkje. Men om ein er litt nevenyttig og har med seg ein elektrikar, so vil ein jo klare det, seier Saurdal.
Vil bli heilt uavhengig
Denne dagen er det grått og overskya. Medan huset til Saurdal framleis produserer, må han bruke av straumnettet på dagar som dette.
Men ein plan har han.
– Eg loggar jo vêret her. Meir eller mindre alltid når det er overskya, so bles det alltid nok til at vi faktisk vil klare å få inn 20–25 kilowatt berre med vind.
So det neste store prosjektet i nabolaget vert ein liten vidturbin. Då håpar Saurdal på å bli heilt uavhengig av straumnettet.