Hopp til innhold

Lange køar på ferjekaien grunna uvêr

Både Norled og Fjord1 har lagt om rutene sine i Stavanger-området grunna sterk vind og høge bølgjer. – Situasjonen er truleg i ferd med å normalisera seg, seier regiondirektør i Norled, Gaute Gangenes.

Kø på Mekjarvik

BOKNAFJORD-SAMBANDET: Ferjesambandet mellom Mortavika og Arsvågen bruker nå Mekjarvik som alternativ ferjekai. Noko som gjorde at Kvitsøysambandet heller tok i bruk Fiskepiren i Stavanger.

Foto: Ole Andreas Bø / NRK

  • SISTE: Nå går ferjesambandet mellom Arsvågen og Mortavika i normalrute.

Ferjene på E39 over Boknafjorden har tysdag føremiddag gått mellom Arsvågen og Mekjarvik, i staden for Mortavika, på grunn av sterk vind.

Dette skapte vidare problem frå Kvitsøy-ferja som normalt bruker Mekjarvik-kaien.

Øyvind Eikelid

Øyvind Eikelid blei ståande i ferjekø på Mekjarvik.

Foto: Ole Andreas Bø / NRK

– Ferja til Fjord1 stod jo der ei lang stund utan å koma seg ut grunna den sterke vinden. Så i staden for å konkurrera om den same ferjekaien gjekk me heller inn til Stavanger, seier Gaute Gangenes, som er regiondirektør i Norled.

Oppdatert ferjeinformasjon

Derfor gjekk 9-ferja til Kvitsøy frå Fiskepiren i Stavanger. Øyvind Eikelid er ein av dei som derfor ikkje kom seg inn til Kvitsøy, men blei ståande i kø.

– Eg skulle over med materiale til ei hytte, så den hytta blir nok ikkje bygd i dag, seier Eikelid, som tek det heile med godt humør.

Gaute Gangenes reknar med at avgangane utover dagane vil gå frå Mekjarvik.

Her finn du oppdatert informasjon om avgangane.

Ifølgje begge ferjeselskapa så må ein rekna med litt forseinkingar i sambandet.

Problem for cruiseskip

Vêret skaper også problem i cruisetrafikken i Rogaland.

Skipet «Mein Schiff 4» skulle ha gått inn til Haugesund tysdag morgon, men blei på grunn av vêret liggande i Bergen.

Det skriv Haugesunds Avis.

Vinden førte til store endringer i ruteplanen.

Boknafjord-ferja hadde problem med å leggja til også i Mekjarvik.