- Siste: Vegen er nå opna
Omkøyringsvegen kunne ikkje brukast av større køyretøy. Derfor blei det lange køar av bussar og trailerar etter ulukka.
Foto: Rosa Iren Villalobos / NRKLike etter klokka 16.30 melde politiet om ein front-mot-front-kollisjon på E39 ved Statoil sitt gassanlegg på Kårstø. Dette er like nord for Arsvågen ferjekai.
Skadeomfanget er ukjent, men ein mann i 50-åra er frakta med helikopter til Stavanger universitetssjukehus, han skal ha vore åleine i den eine bilen.
– Tre personar er frakta til sjukehus. To til Haugesund sjukehus med ambulanse og ein med helikopter til Stavanger universitetssjukehus, seier fagleiar i brannvesenet Tysvær, Kjetil Staveland.
I den andre bilen sat ein mann og ei kvinne. Desse kom altså frå ulukka med lettare skader.
Tre personar er frakta til sjukehuset etter trafikkulukka.
Foto: Kjell BuaUlukkesgruppa er på veg
Ifølgje vitneobservasjonar skal bilen som kom sørfrå ha kome over i motsett køyrefelt før kollisjonen.
– Statens vegvesen si ulukkesgruppe skal granska ulukka, seier Håkon Tornes, som er operasjonsleiar i Haugaland- og Sunnhordland politidistrikt.
Kort tid etter ulukka blir det meldt om lange køar. Sidan det er fredag før haustferien er det meir trafikk enn på ein vanleg fredag.
Klokka 18.30 melder politiet om at eitt køyrefelt er opna, slik at tyngre køyretøy kan passera ulukkesstaden. Klokka 19.40 er vegen open.
