Denne «spanske» skinka er norsk

– Her har me avansert utstyr, som gjer at me kan styra luftfukt og temperatur i desse klimaromma, seier Terje Wester.

Han er konsernsjef i Fatland Slakteri i Rogaland, som står bak ideen om å gjera serranoskinka norsk. På slakteriet har dei kopiert det varme klimaet der skinka blir produsert, og lagt det inn i eit datastyrt modningsrom. Her skal den godgjera seg i eitt år.

– Førebels er ikkje produksjonskapasiteten utnytta, men det kjem, seier Wester.

– Garantert kortreist skinke

NRK har tidlegare fortalt om den lange reisa mellom anna spanske og italienske skinker har, før dei kjem i butikkane i Noreg.

For å unngå toll, blir dyr slakta i Spania og frakta til Noreg for å få eit stempel. Så blir dei sende tilbake til Spania for å bli til skinke.

– Dette blir garantert kortreist. Med ein god sykkeltur, skal me klara å besøka alle produsentane som trengst for å laga skinka, seier Wester.

• LES ÒG: Listhaug vil ta opp skinke-saken
• LES ÒG: Serranoskinke pakkes i Danmark

Dyrt og tidkrevjande å produsera skinka

Det har vore ein lang veg frå ideen kom, til den første prøveskinka var på plass. I tillegg til serranoskinka, skal dei òg produsera «norsk» parmaskinke.

– Me var i fjella der dei produserer mest parmaskinke, og såg korleis dei gjorde det. Rommet me har kjem frå ein leverandør i Parma, og er heilt kopiert på det klimaet som skinka skal modnast i, seier konsernsjefen.

Det tek altså opp mot eit heilt år før skinka er moden. Den lange lagringa kostar pengar.

– Me skal både slakta, skjæra og produsera skinka. Men med denne nye metoden håpar me at lagringstida kan kortast ned, seier Fatland-eigar Vidar Fatland.

• LES ÒG: Færre bønder lager kortreist mat

(Artikkelen held fram under videoen.)

Testpanel: – Noreg har ein veg å gå

Førebels er det berre ein prøveproduksjon, men skinka skal etter planen vera i butikkane til våren neste år.

– Det er med skinke som med konjakk. Dei eldste årgangane er best, seier konsernsjefen med eit smil.

Men kva seier ekspertane? Vil dei kjenna skilnad på norsk og spansk serranoskinke? NRK inviterte eit testpanel frå Gastronomisk Institutt for å smaka. Og det gjekk ikkje lang tid før dei kom med sin samrøystes konklusjon.

– Den spanske skinka er modna lenger. Noreg har ein liten veg å gå når det gjeld spekeskinke, seier dagleg leiar ved Gastronomisk Institutt, Tommy Raanti.