NRK Meny
Normal

Kvinne (27) melde valdtekt til politiet

Ei 27 år gamal kvinne er frakta til valdtektsmottaket i Stavanger, etter ho skal ha blitt utsett for seksuelt overgrep i Stavanger sentrum natt til første mai. Politiet har sikra spor i saka.

Voldtekt i Stavanger

Her mellom Stavanger domkirke og Stavanger katedralskole, Kongsgård, skal ei kvinne ha blitt valdteken av ein ukjent gjerningsmann natt til første mai.

Foto: Ronny Hjertås

Klokka 23.25 onsdag kveld blei politiet kontakta av ei 27 år gamal kvinne. Ho forklarte at ho hadde blitt seksuelt misbrukt i passasjen mellom Stavanger domkirke og Stavanger katedralskole, Kongsgård.

Politiet fekk ingen skildring av gjerningspersonen, anna enn at det var snakk om ein mann. Kvinna blei deretter frakta til valdtektsmottaket i Stavanger der det mellom anna blir sikra tekniske spor.

– Ho skal inn til avhøyr i føremiddag, opplyser operasjonsleiar, Henning Andersen, i Rogaland politidistrikt.

Politiet har sikra spor

Området der valdtekta skal ha skjedd blei sperra av politiet i går kveld.

– Me er nå ferdige med krimtekniske undersøkingar på staden, og har sikra spor, seier vaktleiar, Marianne Hagenes i Rogaland politidistrikt til NRK.no torsdag morgon.

– Kva type spor er det snakk om?

– Det vil me ikkje gå inn på nå, seier Hagenes.

Politiet er i full gang med å etterforska saka, og dei er interesserte i å koma i kontakt med personar som har vore i området ved Stavanger domkirke i tida før klokka 23.30 i går.

– Det var ein utedag i går, så det var ein del folk ute, seier ho.

Ingen tekne så langt

Den 27 år gamle kvinna skal i dag inn til avhøyr. Politiet vil ikkje sei noko om dei mistenker namngidde personar i saka.

– Me etterforskar saka på vanleg måte, og har så langt ikkje teke nokon, seier Hagenes.

Laster kart, vennligst vent...

I denne passasjen i Stavanger sentrum skal valdtekta ha skjedd.