Overfallsranet skal ha skjedd litt før klokka 20, opplyser politiet.
– Kvinna var ute og jogga. Ved fotballanlegget stoppa ho opp for å knyta skoa. Då kjende ho eit smell bak i hovudet, fortel Sør-Vest politidistrikt avdeling Stavanger, Karstein Tendenes.
To menn tok frå henne eit bankkort og eit busskort før dei stakk av. 21-åringen er nå på legevakta, men har klart å gi ei forklaring på korleis dei to mennene såg ut.
Politiet vil ha tips
– Dei var om lag 180 centimeter høge, kledde i mørkt og dei snakka utanlandsk. Den eine av dei hadde hettegenser, seier Tendenes.
Politiet hadde lenge fleire politipatruljar ute i området, som så etter dei to mennene.
– Me har i tillegg vore ute på staden med fornærma, for å få oversikt over korleis det har skjedd, seier Tendenes.
Tirsdag morgon melder politiet at det ikkje er noko nytt i saka og at den vil bli etterforska ved Sandnes politistasjon.
Dei ber også om hjelp frå publikum. Dei ber folk som har tips i saka om å varsla politiet på telefon 02800.
Det skal ikkje ha vore vitne til sjølve hendinga.