– KrF overkjører det demokratiske fleirtalet

Det er i fredagens papirutgåve av Stavanger Aftenblad KrF-leiar Knut Arild Hareide lovar omkamp om bybana så snart det blir regjeringsskifte.

Dermed nektar KrF å gi opp bybana, trass i at lokaldemokratiet har sagt sitt og fylkestinget i desember i fjor sa ja til bussveg-alternativet.

Dette får gruppeleiar for Ap i fylkestinget, Tom Tvedt, til å reagera.

– KrF høvlar over det demokratiske fleirtalet som har sagt ja til bussveg. Samtidig overkjører dei sin eventuelle regjeringspartnar, Frp. Dette er undergraving av demokratiet, seier Tvedt til NRK.no.

– KrF må besinna seg

Førre månad varsla også Høgre at bybana slett ikkje er spora av på Nord-Jæren.

I sitt alternative forslag til nasjonal transportplan (NTP) vil partiet ha skjenegåande transport i storbyane, og lovar at staten skal stå for halvparten av finansieringa.

Til Stavanger Aftenblad fredag seier Hareide at: "Slik eg oppfattar det, er den største bremseklossen lokalt eit litt surt Arbeidarparti."

– Nå må KrF besinna seg og følgja dei demokratiske avgjerdene som er gjort, slik at regionen får det kollektivløftet som trengst, kvitterer Tvedt.

– Bybane vil bli ein katastrofe

Sjølv er Tvedt soleklar på kva han meiner i bybanesaka.

– Ein bybane vil bli ein katastrofe for regionen. Planleggingsarbeidet vil først vera ferdig i år 2021 eller 2022, så vil det ta fem år å bygga bana klar for ferdsel.

Tvedt minner også om NRK sine avsløringar om den omstridde pengebruken på PR-byrået Burson-Marsteller. Fleire politikarar har meint av ugreiingskontoret har fungert som eit propagandakontor og at pengebruken er ein skandale.