Konkurransetilsynet: – Små kjeder gir billegare bensin

– Generelt er konkurransen i drivstoffmarknaden svak og prisane høge, seier Øyvind Nilssen.

Han er fungerande avdelingsdirektør for bygg, industri og energi i Konkurransetilsynet, som overvaker bensin- og dieselprisane i Noreg. Tal frå tilsynet viser at små kjeder på drivstoffmarknaden kjem forbrukarane til gode.

Ei av desse mindre kjedene, Tanken, opna nyleg sin 22. stasjon på Kåsen på Jæren. To av kjeda sine stasjonar ligg i Telemark, medan dei andre ligg i Rogaland.

Var lei av pris-stresset

Nå viser Konkurransetilsynet si prisovervaking at etableringa av Tanken har pressa prisane ned, også hos dei andre kjedene i områda kor Tanken sine stasjonar ligg.

Joar Skorpe opna den første Tanken-stasjonen i 2015. Han hadde jobba på ein YX-stasjon i Stavanger, og var lei av stresset med å finne ut kva for pris dei andre kjedene hadde.

Sidan då har han opna 21 stasjonar til.

– Det første året skulle eg bygge ti stasjonar kvart år. Eg ligg jo litt etter, men målet er framleis det same. Planen er at Tanken skal bli det folk føretrekker på bygdene, seier Skorpe.

Han hugsar godt den første tida etter at den første stasjonen opna.

– Dei første vekene låg vi meir enn ei krone under dei andre. Faktisk så mykje som ei krone og 70 øra lågare. Då var vi nede på 12-talet på bensin, seier han.

Ikkje god konkurranse i Noreg

Sidan har prisen stege. Bensinprisen i Noreg nådde ein førebels topp tidlegare i år. Den gongen var det låg kronekurs som gjorde at bensinen kosta meir enn 17 kroner literen.

Dei største kjedene konkurrerer ikkje så godt, meiner Konkurransetilsynet.

– Vi har fire store nasjonale kjeder i drivstoffmarknaden. Tanken er ein aktør som tenkjer annleis. Dei utfordrar dei fire store, og det har gjort at prisane har gått ned, seier Nilssen.

Tilsynet kan ikkje seie nøyaktig kor mykje prisen går ned i områda kor små kjeder finst. Årsaka er at bensinprisar varierer frå dag til dag og område til område. Men tendensen er heilt klar, ifølgje Nilssen.

– Vi ser at prisane er lågare der dei er til stades, seier han.

• LES OGSÅ: Fyller du bensin på faste dager? Ikke så lurt!