Knuste buss-skur for 50 000

Hopp til innhold

– Det kostar om lag 4000 kroner å skifte ei rute, og det er vanlegvis fire til seks slike ruter i kvart buss-skur.

Dette fortel Rune Ølberg som er operativ sjef i JCDecaux i Sør-Rogaland. Han ser tilbake på nok ei helg der nokon har knust fleire av buss-skura som bedrifta har ansvaret for.

Les også: Supportarbuss utsett for hærverk

– Enten slår dei med noko hardt på rutene, eller også brukar dei skytevåpen, fortel han.

Ikkje alle rutene var knuste i to av buss-skura, slik at prisen på hærverket denne gongen kjem opp i om lag 50 000 kroner.

Fleire i nord, færre i sør

Trass i knusinga på Harestadvegen i Randaberg, så går utviklinga i positiv retning. I 2014 skifta JCDecaux ut 169 glas i buss-skura i Sør-Rogaland. I fjor var talet nede i 141.

Les også: Skadeverk på minst ti busser

I Nord-Rogaland derimot har det vore ei auke i hærverket. 24 knuste ruter i 2014, 29 i 2015.

Få tilfelle oppklart

All glasknusing blir meldt til politiet frå JCDecaux si side. Oppklaringsprosenten er derimot ikkje imponerande.

– Det er berre i Sør-Rogaland, der gjerningspersonen blei observert på staden, at det har ført fram til oppklaring, skriv JCDecaux i årsrapporten for 2015.