Vinnaren av den første kampen blei Oilers. Mindre enn eitt minutt inn i sudden death, altså fjerde periode, skåra Dan Kissel 4–3 målet.
– Nå er det å nullstille seg til neste kamp, seier Oilerstrenar Pål Guldbrandsen.
Han meinte Oilers var best, men at dei blei straffa for nokre enkle forsvarsfeil, som må ryddast vekk framføre neste kamp.
Toppskårar Mark Van Guilder i Oilers er førebudd på endå hardare motstand når laget skal til Asker på måndag.
– Me må løfte oss kraftig for å kunne vinne også den kampen seier han, som er godt nøgd med å laga eit mål i kveldens kamp.
Slik var kampen
Bortelaget kom utan tvil best i gang. Etter første periode leia Frisk Asker 0-1, etter skåring av Fredrik Lystad Jacobsen.
Andre periode var berre fire-fem minutt gammal då Frisk Asker går opp til 0–2 leiing. Denne gongen er det Ryan Hayes som skårar for Askerlaget.
Skåringa blir godkjent først etter at dommarane såg situasjonen ein gong til på video.
- Les også:
Midtvegs ut i andre periode slår Oilers brått tilbake. Først blei det 1–2 ved Spencer Humphries. Og mest før publikum hadde fått sett seg ned etter applausen var det tid for utlikning. Den blei kreditert storskåraren til Oilers, Mark Van Guilder. Det står 2–2 i kampen.
Nokre minutt ut i tredje periode, slo den tidlegare NHL-proffen, Eric Nystrom til for Oilers og det sto 3–2 i nokre få minutt. Så kontra Frisk Asker og utlikna igjen til 3–3 ved Nick Pageau.
- Les også:
Harde tak
Mot slutten av andre periode blei Oilersspelaren Mark Van Guilder takla av Petter Kristiansen frå motstandarlaget.
Van Guilder kolliderte med Frisk Asker sin keeper, som følge av taklinga og keeper Nicklas Dahlberg måtte gå av banen med det som kan ha vore ei hjerneristing.
Frisk Asker-spelaren fekk 10 minutt utvising for usportsleg oppførsel etter den episoden.
- Les også:
Gjekk til fjerde periode
Ingen av laga klarte å avgjera kampen innanfor normal speletid. Derfor blei det ein fjerde periode der det laget som skårar det første målet vinn kampen.
Den bragda var det Dan Kissel og Stavanger Oilers som sto for. Dermed har laget ei 1–0 leiing i kampar over Frisk Asker. Det laget som først vinn fire oppgjer, stikk av med kongepokalen, eller "byttå" som den heiter på stavangersk.