Onsdag kveld er det tid for ei felles samling mellom formannskaps-politikarane i Forsand og Strand.
- Det er altså ikkje eit formalisert felles formannskapsmøte me snakkar om, men ei samling der me skal sjå på kva me eventuelt kan samarbeida om.
Det seier ordførar i Strand, Helge Steinsvåg.
Fire område
Når politikarane samlar seg på Lysefjordsenteret i Forsand, så kjem fire administrative grupper til å leggje fram sine forslag til samarbeid.
Det gjeld "Felles legetenestar". Det er ikkje snakk om leggja ned legekontoret i Forsand, men det kan vera å klara seg med ein kommunelege.
"Felles plan og forvaltning". Byggesøknader kan koma til å behandlast på eitt felles kontor.
"Felles kulturavdelding". Ein kultursjef og ikkje to som i dag, kan bli resultatet.
"Felles næringsavdeling". Søknader om støtte til næringsverksemd, kan gå til behandling på ei avdeling som er felles for begge kommunane.
Politikarane avgjer
Strand-ordførar Helge Steinsvåg, ser fram til fellesmøtet, men han tar ingen ting på forskudd.
- Nå skal politikarane få høyre på forslaga som blir lagt fram og så får me sjå om dette er noko det kan bli enighet rundt, seier Steinsvåg.