Kan lade mobilen i kjøkkengardina

Helge Karlsen er 57 år og utdanna ingeniør. Dei siste åra har han brukt mykje tid på den spesielle svarte gardina, som nå heng på kjøkkenet hans.

Den ser ut som ei vanleg rullegardin, med ei om lag 15 gonger 15 centimeter stor vifte innebygd i gardina, men skil seg kraftig frå vanlege gardiner på andre måtar.

– Med denne usb-kabelen kan eg for eksempel lade opp mobilen min. Energien kjem frå sollyset som skin på gardina, seier Karlsen.

Og dette er berre ein av mange funksjonar. I tillegg kan gardina bidra med oppvarming av rommet. Den kan brukast til ventilasjon og den kan fjerne luftfuktighet, for å nemne nokre av dei innstillingsmoglegheitene som Karlsen fortel om.

Innovasjon Norge er ikkje interessert

Problemet, slik Karlsen opplever det, er at han ikkje får sjanse til å utvikle oppfinninga og setje den i produksjon. Det blir for dyrt.

– Innovasjon Norge har ikkje kompetanse til å forstå kva potensial smartgardina mi har, hevdar Karlsen.

– Det eg får beskjed om derfrå er at eg må finne meg ein finansiell partnar som vil investere pengar i oppfinninga, men det er jo ikkje lett å skaffe, seier han,

Ulike oppfatningar

Ein kilometer lengre vest på Forus, over i Stavanger kommune, held det nystarta selskapet Future Home til. Dei leverer ei løysing for å styre mellom anna oppvarming, lys og gardiner i privathus.

Ein av gründerane, Erik Stokkeland, har ei heilt anna oppfatning av Innovasjon Norge.

– Dei hjelpte oss til å bli gründerar, fortel han. Dei gav oss eit lynkurs i at me måtte bruke meir tid på å finne kundar som ville betala, og mindre tid på å perfeksjonera ideen vår.

– Dei er veldig flinke til å utdanna gründerar, slår Stokkeland fast.

Kassa er tom

I Rogaland hadde Innovasjon Norge brukt opp alle løyvingar for 2015 i juni i år. I ein situasjon der kreative menneske mista arbeidet i oljesektoren, var det mange som hadde idear dei ville utvikle sjølve.

Regjeringa løyva 100 millionar ekstra til Innovasjon Norge, på landsbasis, i sist veke, for å fylla opp støttekontoen. Men for fylkesordførarkandidat i Rogaland, Marianne Gudmundson Chesak frå Arbeidarpartiet, så var ikkje dette godt nok.

– Det er bra at dei forstår alvoret og løyver 100 millionar kroner ekstra til Innovasjon Norge i heile landet, men dette er for lite. Gründarane i Rogaland treng meir, seier fylkesordførarkandidat for Ap, Marianne Chesak.

Per Kåre Foss, fylkestingskandidat for KrF, er heilt usamd i denne framstillinga. Han meiner at dette viser at regjeringa tar ansvar og handlar, når det er nødvendig.