Det er ikkje kvardagskost med så gode vinterforhold som ein opplever i Rogaland nå. Det var derfor NRK Rogaland sin reporter Johan Mihle Laugaland fekk ideen om at han skulle vera ute i skisporet under heile morgonsendinga på P1.
Det viste seg å bli lettare sagt enn gjort.
– Det såg så jomfrueleg og fint ut her på marka, men under den fine snøen er det djupe traktorspor. Så plutseleg låg eg der, seier Johan etter fallet.
Det viste seg seinare at skadeomfanget var omfattande. Tommelen hans var forstua, medan antenna på radiosendaren var brokken.
Høyr Laugaland på radioen etter fallet:
Problem allereie i oppstarten
Allereie før Laugaland skulle setja i gang med skigåinga si blei det klart at dette ikkje skulle gå knirkefritt.
Då radiosendinga byrja klokka 06.03 gjekk det opp for han at han hadde teke feil ski. Dei passa ikkje med bindingane, og han kom seg ikkje av garde som planlagt. Dermed måtte han køyra heim å henta nye ski.
Sjå video frå fiaskostarten her.
Enden var god
Trass klabb og babb, og lite snø på vegar og fortau. Då radiosendinga gjekk mot slutten i ni tida kom han seg til Mosvatnet. Her er skiforholda perfekte.
Laugaland kunne leggja alt som hadde skjedd bak seg og nyta det flotte augeblink med vinter i Rogaland.