Jærbanen kan bli konkurranseutsett

"Gratulerer til deg som reiser med tog", stod det på løpesetlane som lokale politikarar delte ut på perrongane langs Jærbanen i dag tidleg. Den nye jernbanereforma, som regjeringa lanserte i går, vil også nå strekninga mellom Stavanger og Egersund.

• LES OGSÅ: Ny organisering og mer konkurranse på skinnene

Terje Halleland (Frp), som er varaordførar i fylkeskommunen i Rogaland, meiner auka konkurranse på Jærbanen kan gi togreisande eit betre tilbod.

– Me håpar at me skal greia å gjera denne strekninga så attraktiv at me får mange tilbydarar. Då stig mangfaldet, og då håpar eg at me greier å skape eit attraktivt tilbod som fleire reisande vil nytte seg av, seier Halleland.

For Halleland har stor tru på at konkurranse kan bidra til at kvaliteten på togtilbodet blir betre.

– Heile intensjonen med reforma er å få til eit tilbod som folk kan lite på og at toget kjem og går når det skal, seier Halleland.

• LES OGSÅ: - Solvik-Olsen brukar feil oppskrift

Artikkelen held fram under bilete

KrF er litt skeptiske

På perrongen i Stavanger stod også representantar frå Krf, dei er ikkje like overtydde om konkurranseutsetting som det Frp er.

– Me er litt skeptiske, men samstundes er me opne for å sjå på ulike moglegheiter for at tilbodet skal bli endå betre, seier Solveig Ege Tengesdal frå Rogaland Krf.

Og at det no kjem ei ny jernbanereforma er dei glade for.

– Me trur det er veldig mykje bra i denne reforma. Å løyve meir pengar til jernbanen trur me er det som skal til å løfte det endå meir.

– Ei rasering av tilbodet

SV i Rogaland meiner derimot at ei konkurranseutsetting av Jærbanen er reine galskapen.

– Eg skjøner det ikkje, Jærbanen er jo den strekninga i landet som fungerer. Ei konkurranseutsetting vil berre rasere dei tilsette sine arbeidsforhold og på sikt også togtilbodet, seier Heidi Bjerga i Rogaland SV.

Ho seier det allereie er vedteke planar for Jærbanen, som vil styrke togtilbodet, utan ei konkurranseutsetting.

– Eit anbudssystem baserer seg på at det er berre der det er mest å hente at ein legg opp tilbodet. Så om det viser seg at det er for få reisande, så kan ein risikera at togstopp blir lagt ned. I tillegg kan ein risikere at dei som er tilsett lokalt i dag mistar jobbane sine, fordi tilbydarane har billegare tilsette i eigen regi, seier Bjerga.