NRK Meny
Normal

Nå får smale idrettar ei eiga NM-veke

Norges idrettsforbund ønsker å skapa ei publikumsvenleg sportsveke ved å samla fleire NM-finalar i eit slags «mini-OL». I Sverige er allereie SM-veckan ein suksess.

BMX

NYTT KONSEPT: Norges Idrettsforbund og NRK byr opp til unik idrettsfest i Stavanger-regionen i august neste år. (Illustrasjonsbilete frå BMX-tevling under Beijing-OL i 2008)

Foto: Greg Baker / AP

I dag lanserte Norges idrettsforbund planane om ei årleg NM-veke frå og med neste år.

– Planen er å samla norske meisterskap som ein kanskje vanlegvis ikkje ser på TV, slik at dei blir meir synlege og får større flater til å visa seg fram og rekruttera fleire utøvarar, seier Dag Oliver, som er prosjektleiar i Norges idrettsforbund.

Dermed kan ein få sjå alt frå finalar i badminton til BMX over ei komprimert idrettsveke.

NRK, som har vore med på planlegginga av konseptet, vil også dekka NM-finalane.

Saman for NM-veke

Sportsredaktør i NRK Egil Sundvor (t.v.), idrettspresident Tom Tvedt, Stavanger-ordførar Christine Sagen Helgø, Sandnes-ordførar Stanley Wirak, Toril Lende Fjermestad frå Rogaland idrettskrets, leiar i Stavanger idrettsråd Arne Thorsen Eie, fylkesordførar i Rogaland Solveig Ege Tengesdal, leiar for særforbunda i idrettsforbundet, Terje Jørgensen, Randaberg-ordførar Kristine Enger, Rune Røyksund i Rogaland idrettskrets, Anette Larsen Bognø i Region Stavanger, Karton Nilsen frå Sørmarka flerbrukshall og Sola-ordførar Ole Ueland var nokon av dei som var på plass i Sørmarka Arena for å meisla ut planane for NM-veka 2018.

Foto: Kaj Hjertenes / NRK

– Publikumsvenleg mini-OL

– Dette blir eit mini-OL som blir veldig bra TV. Me ønsker å løfta fram breidda i norsk idrettsliv. Enkeltvis står ikkje desse idrettane spesielt godt fram, men saman er sjansen stor for at dei kan gjera det, seier Egil Sundvor, sportsredaktør i NRK.

Det er allereie bestemt at NM-veka dei to første åra skal arrangerast i Stavanger-regionen. Då er det mellom anna symjeanlegget Gamlingen, Sørmarka arena, BMX-banen på Sviland, jærstrendene og skateparken på Tasta ting skal skje.

TIl neste år har allereie 20 særforbund vist interesse for å bli med, medan det i 2019 er venta at meir enn 40 særforbund kjem til å melda seg på.

John Henry Nilsen

KLATRING: Klatreforbundet har vist interesse for å vera med. Her frå NM i klatring i Orkdal 2016.

Foto: Ragnhild Trondvoll
Bodø Barbarians, rugby

RUGBY: Rugbyforbundet er eit av særforbunda som har vist interesse for å vera med. Her er det Bodø Barbarians som er i aksjon.

Foto: Kent Grundstad

Svensk konsept

Ideen er henta frå Sverige der det blir arrangert SM-finalar i opp mot 250 ulike idrettsgreiner over ei veke (neste gong i mars). Der har dei arrangert folkefesten heile seks gonger.

SVT dekker arrangementet, og Finland skal også ha vist interesse for å laga ei liknande veke.

Norges idrettsforbund ønsker å skapa ei publikumsvenleg sportsveke ved å samla fleire NM-finalar i eit slags «mini-OL». I Sverige er allereie SM-veckan ein suksess.

Her er høgdepunkta frå SM-veckan 2017. (Med løyve frå SVT).