– Når me ser på veksten i bilindustrien, så er det ei bølge me ønsker å vera med på, seier einingsleiar ved støyperiet på Karmøy, Asle Voll.
Hydro på Karmøy investerer over 20 millionar kroner i utstyr for å bli ein viktig leverandør av aluminium til bilindustrien i Europa.
Voll synst dei nye investeringane til bedrifta er svært spanande, både som forretningsutvikling, og som tiltak for å bevara arbeidsplassar.
Kvalitet og presisjon avgjerande
Bilindustrien er veksande, og det er eit aukande behov for aluminium av høg kvalitet i bransjen. Grunnen er at fleire delar på bilane må vera av aluminium for å få vekta ned, slik at dei blir miljøvennlege nok. Det seier fabrikksjef Trond Olaf Christophersen.
– Presisjon, og det at metallet me lagar her kan få så fin kvalitet, er det som er avgjerande. Det er bilprodusentane veldig opptekne av. At me leverer feilfritt.
– Kor viktig er bilindustrien for Hydro og produksjonen framover?
– Veldig viktig. Samla sett så investerer Hydro over ein milliard kroner i ulike fabrikkar i Europa, for å satsa mykje sterkare inn mot bilindustrien. Og me ser at bilindustrien er den marknaden som veks mest i Europa i åra som kjem.
Grunna fall i aluminiumsprisen meiner fabrikksjefen at det er ekstra viktig å satsa inn mot meir krevjande produkt og marknadssegment.
- LES OGSÅ: – Det største for industrien på eit tiår
Spanande framtid
Også fleire andre av Hydro sine fabrikkar i Norge stasar inn mot bilindustrien i Europa. Samla er det på halvtanna år investert over hundre millionar kroner i støyperia til Hydro, for å kunne møta den veksande bilindustrimarknaden.
– Det er veldig spanande for oss i støyperiet, og det er klart dette er eit steg inn i framtida, avsluttar Voll.
- LES OGSÅ: Denne oljebedrifta har fleire bein å stå på
- LES OGSÅ: Disse fylka vinnar industrikampen