Politiet fekk melding om brannen kl. 04:18. Det var ein av bebuarane i huset som ringde inn og melde i frå om brannen.
– Tre personar, eit par og eit spedbarn, budde i huset. Men dei kom seg alle ut, fortel operasjonsleiar Jan Geir Hessen.
Dei vart sende til sjukehus for sjekk.
– Spedbarnet vart lagt inn på sjukehus med lettare skader, men blir høgst sannsynleg utskriven i dag, seier kommunikasjonssjef ved Haugesund sjukehus, Margrethe Langebro.
Då brannmanskaper kom til staden i natt var det full fyr i huset, og dei vurderte det slik at det var fare for at brannen kunne spreie seg.
– Me valde difor å evakuere dei som budde i husa som låg nærmast, det var snakk om rundt 3–4 hus, seier Hessen.
Brannen er no under kontroll, og naboane har fått lov til å flytte heim att.
Huset har blitt totalskadd i brannen.
Skal etterforske brannårsak
Brannvesenet er no i ferd med å avslutte ettersløkkingsarbeidet.
Brannårsaka er førebels ikkje kjend, og politiet vil no starte etterforsking.
– Me har etablert vakthald på staden, fordi dette no er ein åstad som skal undersøkast, fortel operasjonsleiar Trond Friberg.