– Å få henge det ut er husmorlukke

Straumprisane gjer at det er på tide å hente tørkesnora opp frå gløymeboka, trur Tonje Nærland Kloster.

Tonje Nærland Kloster

Tre små ungar. Barnehage, fotball og drill. Fjøs og gard. Kloster må køyre vaskemaskina mange gongar på ei veke – uansett straumpris.

Tonje Nærland Kloster ser på kamera
– Å få henge det ut er husmorlukke. Det er ein god ting, og i alle fall i desse dagar. Då er eg glad for at eg har lært det av mor!

Ho trur tørking på klessnor er gått i gløymeboka for mange. Men på garden på Jæren er klesklyper framleis på moten og godt brukte.

Øystein Otterdal / NRK

Det er ikkje berre straumprisane som gjer at Kloster likar å henge ut vasken sin.

– Dei vert jo litt rettare når dei blafrar i vinden. Eg slepp å stryke kjolar, til dømes, og det er jo flott. Det er ikkje det eg gjer mest, å stryke og slikt.

Anne Jorunn Frøyen står ved ei stor bokhylle

Anne Jorunn Frøyen er konservator på Jærmuseet og har skrive om nettopp klesvask – om maskinene ein hadde for hundre år sidan då, ikkje tørketromlar.

Ho er einig i at klessnorene kringom støvar meir ned enn dei er i bruk, trass i at nordmenn køyrer vaskemaskina stadig.

– Vi har meir klede enn før og vi vaskar oftare. Mange vaskar kvar dag. Ungar og trening og hist og her, det er ein stor jobb, seier ho.

– Skal ein tørke ute, må ein jo vere på alerten heile tida.

At kvinner er meir på jobb utanfor huset, betyr at dei har mindre tid til å passe klesvasken for regn eller gjødsellukt, om naboen skulle byrja med det utan førevarsel.

Og gjødsellukt i tunet er jo ikkje noko uvanleg når ein bur på gard. Om naboen tek til å spreie skit får Kloster fort ein telefon om å ta inn klesvasken sin.

– Gjødsellukt i rein vask vil du ikkje ha noko av, seier ho.
– Eg toler mykje gjødsellukt ute, men ikkje akkurat i lakenet, seier Kloster og ler.

Kloster var heldig i dag. Vind, sol og ingen skitlukt. Vasken er tørr og fin utan at ho har måtte betale straumen for å køyre tørketrommelen.

Kanskje du vil hengje kleda ute i dag? So sant naboen ikkje gjødslar, då ...