KRITISK: Sahfana Mubarak Ali er minoritetsrådgjevar i IMDI og bystyrepolitikar for Arbeidarpartiet i Stavanger. Ho er kritisk til FpU-demonstrasjonen. Mubarak Ali er muslim med røter frå Sri Lanka, og bruker hijab.
Foto: Mathias Oppedal / NRK– Det er viktig for oss å setja fokus på at det framleis i dag er veldig mange kvinner som blir utsett for grov mishandling og undertrykking, seier Charlotte Søyland som er forman i FpU-Rogaland.
Ho skal saman med to andre FpU-arar kle seg opp i burka på kvinnedagen og demonstrera på Domkirkeplassen i Stavanger.
– Eg ser fram til å få prøvd ut burkaen, seier ho.
- Les òg:
- Les òg:
Dei grunngjev burka-demonstrasjonen med at dei meiner det muslimske klesplagget er eit symbol på undertrykkinga som kvinner opplever.
– Snakkar med to tunger
– Det er ingen som ønsker å ha på seg burka. Det kjennest påtvinga, seier nestleiar i Rogaland FpU, Eirik Thorsen Børseth, til Stavanger Aftenblad i forkant av demonstrasjonen.
Ei som reagerer på den planlagde demonstrasjonen er minoritetsrådgjevar i IMDI og bystyrepolitikar for Arbeidarpartiet i Stavanger Sahfana Mubarak Ali.
– Dette vil først og fremst provosera og eventuelt gjera vondt verre. Det er ikkje vegen å gå, seier ho til NRK.
Charlotte Søyland er open for at pornografi kan vera kvinnefrigjerande, og ho er imot bruk av burka, Mubarak Ali meiner det er ein stor motsetnad i dette.
– Ho taler med to tunger. Når ei kvinne skal få kle seg naken om ho vil, skal ikkje ei kvinne då få lov til å kle seg i burka om ho vil, seier ho.
Ho understrekar at ho er glad for at me har religions- og ytringsfridom. At ei kvar kvinne sjølv kan velja om ho vil gå med hijab, burka, bikini eller kva som helst.
HEILDEKKJANDE: Ein burka er ei heildekkjande kvinnedrakt som blir brukt offentleg i mange muslimske land. Det er dette antrekket FpU-demonstrantane vil ta på seg under kveldens demonstrasjonen.
Foto: NICOLAS ASFOURI / AFPFår ikkje vera med i Byparken
Helst ville demonstrantane frå FpU stått i Byparken, der hovudmarkeringa for kvinnedagen i Stavanger skal skje, men det fekk dei ikkje lov til.
Stavanger kommunes arrangementskoordinator, Terje Emil Knutsen, seier til Stavanger Aftenblad at avgjersla ikkje er politisk frå deira side.
– Dei har fått ein annan plass fordi Byparken var opptatt 8. mars. Viss dei ønsker å stå saman med dei andre, så må dei ta det opp med arrangørane i 8. mars-komiteen, seier Knutsen til avisa.
– Me fekk klar beskjed om at me var uønskte, seier Charlotte Søyland.
– Kjenner du deg utstøytt?
– Ja, verkeleg. OTTAR meiner at me berre er der for å plaga og provosera. Det synst eg er ganske frekt. Me er også kvinner, og sjølv om me er på høgresida må me få lov til å sei det me meiner. Dette er kvinnedagen for alle kvinner, seier Søyland.
