Her får politikarane sykkelsjokk

Stavangerpolitikarane fekk sykkelsjokk då dei drog på studietur til København i helga.

Kondomdressar, hjelmar og gule vestar var knapt å sjå i bygatene. Treningsantrekk var byta med dress og skjørt – og sportssyklane var byta med mødrer og fedrar på familiesyklar.

– Samanlikna med Stavanger er dette ei anna verd. Her dusjar ikkje dei som syklar til jobb. Folk syklar i eit tempo som gjer at dei berre blir varme, ikkje sveitte, seier leiar for kommunalstyret for miljø- og utbygging, Egil Olsen.

(Artikkelen held fram under bilete).

Les også: Menn kjøper syklar dei ikkje brukar

35 prosent syklar dagleg

Saman med resten av kommunalstyret fekk Olsen seg eit skikkeleg sykkel-kultursjokk i helga.

– I København bruker ikkje folk hjelm. Alle køyrer i same fart, uansett korleis dei er kledd. Alt er lagt til rette for ein fart på om lag 15 km/t.

35 prosent av innbyggarane i den danske hovudstaden bruker sykkelen dagleg til jobb og skule, berre 29 prosent bruker bilen.

Alle trafikklys er lagt opp etter syklistane sin fart. Bilvegar er smala inn til fordel for breiare sykkelvegar. Jamvel eigne sykkelbutlarar er tilsett for å plassera feilparkerte syklar i stativ og smøra kjettingane med olje.

Les også: – Denne sammenleggbare el-sykkelen er en revolusjon

Vil bli verdas beste sykkelby

Den københavnske sykkelpolitikken er ikkje tilfeldig. Byen tar nemleg mål av seg om å bli verdas beste sykkelby.

– For dei fleste i Købenvan er sykkelen det viktigaste transportmiddelet for å ta seg fram, seier Marie Brandum Bay i Københavns sykkelsekretariat.

Torfinn Ingeborgrud frå Miljøpartiet De Grønne erkjenner at ein i Stavanger og Norge ikkje har kome så langt når det gjeld å få opp talet på syklande til jobb og skule.

– Faktisk har andelen syklande i mange norske byar gått litt ned. I København snakkar ein om sykling som transport, ikkje som sport, seier sykkelforkjemparen.

Les også: Skal oppdra kjørelærere på sykkel

– Sykkelen må bestemma

Seksjonsleiar Kari Smådal Turøy i Stavanger kommune har ansvaret for å få opp sykkelbruken i oljebyen. Ho vil gjera det meir praktisk å vera syklist i Stavanger.

– Eg trur det er viktig at syklistane føler seg prioritert som trafikantgruppe. At dei ikkje berre må tilpasse seg alle andre, utan eigne rettar, seier ho.

Egil Olsen i kommunalstyret for miljø- og utbygging trur det må kraftigare lut til.

– Me må gjera som i København; laga eigne plassar der syklistane kan køyra og legga til rette for sykkelbruk. Då er det til slutt sykkelen som bestemmer, seier han.