Her blir dine personlege data lagra

Frå i dag blir all datalagring i Stavanger kommune flytta inn i det tidlegare fjellanlegget til NATO på Rennesøy. Selskapet Green Mountain har spesialisert seg på datalagring for både norske og utanlandske bedrifter, og har nå fått endå ein leigetakar.

Green Mountain

Tryggleiken er streng rundt fjellet på Rennesøy der data frå norske og utanlandske bedrifter blir lagra.

Foto: Ole Andreas Bø / NRK

– Me har teke NATO-tryggleiken og så har me bygd på ein god del lag med trygging på toppen av det. Så det er ekstremt stor fysisk sikring her, seier salsdirektør i Green Mountain, Petter M. Tømmeraas.

Inne i eit fjell, nede ved fjorden på Rennesøy, er det samla tusenvis av løyndomar.

Datahallen inne i fjellet er på heile 22 000 kvadrat, og den skal sikra at all elektronisk informasjon den husar, ikkje blir delt med uvedkomande.

Frå og med i dag vil informasjon om innbyggjarane i Stavanger også bli lagra her.

– Kommunane har jo veldig kritiske data for oss alle. Det er helsedata, vaksinedata, økonomisk data. Ja, det er veldig mykje som no ligg her, seier Tømmeraas.

Trygg løysing

– Stavanger kommune er blant dei første kommunane i Europa til å ta i bruk denne type datalagring, seier leiar i administrasjonsutvalet i Stavanger, Erlend Jordal.

Han ser mange fordelar med å lagre den elektroniske informasjonen på Green Mountain.

– Me vil kunne spare pengar på lang sikt, trygge daltane våre og samtidig gjera dei endå meir tilgjengelege for dei i kommunen som skal bruke dei, seier Jordal.

Frå før har mellom anna DNB si dataavdeling tilhaldsstad inne i fjellet, men fleire kundar er også hemmelege. Spesielt er det dei utanlandske som ikkje vil at det skal bli kjent at dei held til her.

– Ein må ha kontroll på kven som går inn og ut til ei kvar tid, og fører logg på alt. Så det er eit stort system rundt dette, seier Tømmeraas.

Frå i dag blir all datalagring i Stavanger kommune flytta inn i det tidligare fjellanlegget til NATO på Rennesøy. Selskapet Green Mountain har spesialisert seg på datalagring for både norske og utanlandske bedrifter, og har nå fått endå ein leigetakar.

Sjå TV-saka her.