Har lagt kommunesamanslåing på is

Ordføraren i Hjelmeland tar det ikkje veldig tungt. Tvert om, han er faktisk letta og glad for at forsøket på å slå kommunen saman med Strand og Forsand aldri blei noko av.

– Me har prøvd i over eitt år, og me har spurd innbyggjarane kva dei meiner. Resultatet var eit klart nei og nå har me lagt den saka daud, seier Bjørn Laugaland.

Får det ikkje til

På Nord-Jæren har dei hatt mange møter og mange uformelle forsøk på å finne ei løysing. Ennå har ingen blitt samde.

• Les også: – Nå må vi respektere at Sandnes ikke vil

På Haugalandet er situasjonen den same. Ordførar Arne-Christian Mohn tyr til ei historie for å fortelje korleis det følast.

– Det er med Haugesund som med dei to som hadde vore kjærastar veldig lenge. Endeleg ein dag spurde mannen om det ikkje var slik at "me skulle gifta oss?" Jo, svarte kvinna, men trur du det er nokon som vil ha oss?

• Les også: Sveio kommune vil til Rogaland

Ordførar Mohn må berre innsjå at alle forsøk på å få med Karmøy, Sveio, Tysvær og Bokn har mislukkast.

– Dette får me nok ikkje klart til juli i 2016, men kanskje i 2020, kan det sjå annleis ut, seier Mohn.

Nå har dei hastverk

Regjeringa har sett fristen til 1. juli 2016, for å vera ferdig med å greie ut situasjonen.

Les også: Når ikke tidsfrist for kommunesammenslåing

– Då skal alle kommunar i Rogaland ha hatt møter med nabokommunar og dei skal ha spurd innbyggjarane om kva dei synest, seier Anfinn Rosnes, som er ansvarleg for kommunereform-arbeidet hos Fylkesmannen i Rogaland.

Han fortel at regjering ikkje vil endre tidsfristen, og han gir eit spark til dei kommunane som slår seg til ro med situasjonen slik den er nå.

– Alle kommunane skal også ha greidd ut konsekvensane av å bli ståande åleine. Kva konsekvensar det kan få i framtida må dei ha klart for seg, seier Rosnes.

Lyspunkt i mørket

Rosnes hos Fylkesmannen i Rogaland set si lit til dei tre Jærkommunane, Klepp, Time og Hå. Dei jobbar godt i hop, og skal spørje innbyggjarane til råds den 25 april 2016.

• Les også: Tre ordførere, snart bare en kommune på Jæren?

Sør i fylket, i Dalane, er det også positive signal å spore. Der har Eigersund og Sokndal fått i gang ein god samtale og nå har også Lund kommune sagt at dei skal delta i den samtalen.