Det er både enkeltpersonar og spesielle miljø i Haugesund og omegn som nå blir overvaka av PST.
– Me definerer desse personane som ekstreme islamistar, folk som er villige til å bruka vald og terror for å fremja eit politiske mål, seier Bernt Norvalls, leiar av PST i Haugaland og Sunnhordland politidistrikt.
Samarbeider med moskeane
PST har utvida rett i forhold til avlytting og overvaking, samanlikna med det vanlege politiet. Norvalls stadfestar at desse rettane nå blir tatt i bruk på Haugalandet. I tillegg til samarbeid og dialog med dei to moskeane i Haugesund.
– Det er veldig viktig å samarbeida med moskeane og imamane i vårt politidistrikt. Vårt håp er at dei gir beskjed dersom dei får inntrykk at av det føregår ekstreme ting, seier han.
Rekrutterte av «jihad-videoar»
PST har den siste tida også vore opptekne av å ha kontakt med rotlaus og søkjande ungdom som kan vera på veg inn i det ekstreme islamistiske miljøet.
– Me ser at såkalla «jihad-videoar» blir distribuerte rundt omkring. Desse viser mellom anna halshogging og sprenging av soldatar i Afghanistan. Nokre lar seg lokka inn i ekstrem miljø på bakgrunn av dette. Dette må me stansa, seier Bernt Norvalls i PST.
PST understrekar samstundes at trusselnivået for terror er lågt i Norge. Nivået er ikkje heva slik det er gjort i Sverige.