– Eg formulerte meg nok litt feil. Eg burde ha skrive at dei har ein menneskefiendtleg politikk. Ikkje at dei er eit menneskefiendtleg parti, seier Geir Pollestad (Sp)
I dag la regjeringa fram ei krisepakke til norske husstandar, som frå og med neste faktura får eit frådrag på straumrekninga.
Etterpå har regjeringa blitt skulda for å jukse med tal.
Venstre og SV meiner pakka ser lovande ut, medan blant anna Rødt og Høyre meiner det kjem for seint.
MDG er ikkje like nøgde. I eit intervju med E24 seier stortingsrepresentant Rasmus Hansson at Støres opplegg øydelegg klima- og miljøtiltaka i energipolitikken ved å stimulera til framleis høg straumbruk.
Han seier dei ville ha hatt ei permanent ordning, kor ekstraoverskotet staten tener på kraft, blir sendt tilbake til alle nordmenn.
I eit Facebook-innlegg kjem parlamentarisk nestleiar i Senterpartiet med denne karakteristikken av MDG.
Foto: Skjermdump Facebook– Eit menneskefiendtleg parti
Dette får parlamentarisk nestleiar i Senterpartiet Geir Pollestad, til å slenga ut ei melding på Facebook, som har falle i dårleg smak sjå fleire.
– «Det er viktig å få på plass ei ordning som avhjelper dei høge straumprisane for folk i desember-mars. Når MDG er i mot og Høyre meier det kjem for seint, er det gode teikn. MDG er rett og slett eit menneskefiendtleg parti og kritikk derfrå er gull verdt», skriv jærbuen på Facebook
I skrivande stund har innlegget 171 kommentarar på Facebook.
Eivind Trædal, bystyremedlem for MDG i Oslo, er ein av dei som kommenterer.
«Kva slags retorikk er dette, er me i MDG menneskefiendtlege fordi me foreslår at folk får støtte direkte i form av pengar, i staden for å subsidiere høgt straumforbruk?», skriv han.
MdGs Eivind Trædal lurar på kva slags retorikk det er Pollestad brukar.
Foto: Adrian Nielsen / NRKBør halde seg for god for dette
Leiar i Unge Sentrum, Simen Bondevik, spør Pollestad om kva slags måte det er å omtala eit anna politisk parti på.
– «Det burde du halde deg for god for og i staden fokusere på å diskutere sjølve saka», skriv han i kommentarfeltet.
Rasmus Hansson krev at Pollestad forklarar kvifor han brukar dei orda, og tidlegare Natur og ungdom-leiar Gaute Eiterjord kallar det for eit «Listhaugnivå».
Pollestad meiner at han og MDG stort sett er ueinige i absolutt alle saker, men erkjenner at han nok burde ha brukt andre ord i dette innlegget på Facebook.
– Det tok heilt av. Eg såg at MDG reagerte på straumpakken som me kom med, og eg meiner dei ikkje har nok forståing for kor viktig det er å handla raskt her. Eg burde nok ikkje ha brukt dei orda, seier Pollestad til NRK.
– Folk må ikkje bli så krenka
– Men burde ikkje dykk stortingspolitikarar no forsøke å bli einige om ein krisepakke for straum, i staden for å bruke tida på å krangle i sosiale medium?
– Me har lagt fram sak og innhald, og jo, det aller viktigaste no er at me får behandla det i Stortinget, seier han.
Han seier at han no vil tenke seg litt om neste gong, men vil ikkje ha det til at han har lagt seg på eit «Listhaugnivå».
– Eg ligg på mitt nivå. Så får det berre vere slik. Folk må ikkje bli så krenka, så skal ikkje eg bli det heller, seier Pollestad.
