Gebyr får folk til å velja vekk piggdekk

– Salet av piggdekk er bortimot null. Me sel ingenting, slår dagleg leiar ved Stavanger dekksenter, Jørgen Moldt, fast.

Arbeidsfolket på dekksenteret er travelt opptatt med sesongens dekkskift. I ein normalsesong er piggdekksalet her på 20 prosent.

I år er det derimot piggfritt som gjeld for dei aller, aller fleste. Kanskje ikkje så rart når Stavanger, som fjerde by i landet, innfører piggdekkgebyr frå onsdag 1. november (sjå faktaboks).

Det var i april 2016 bystyret stemte for å søka samtykke frå Vegdirektoratet om å innføra piggdekkavgift. Det endelege vedtaket blei gjort i februar i år.

– Mange spør om dei skal betala piggdekkavgifta og gå for piggdekk eller ei. Dei fleste vel å kvitta seg med piggdekka, og heller kjøpa nye piggfrie, seier Moldt.

• LES OGSÅ: Alle må betale piggdekkavgift i Stavanger
• LES OGSÅ: Åtte av ti mener det er riktig med tiltak mot luftforurensing

10 prosent har betalt

Til nå har 350 bilistar med såkalla lette køyretøy betalt piggdekkgebyret i Stavanger (1400 kroner for ein sesong for vanlege personbilar). Det utgjer om lag 10 prosent av det Stavanger kommune ventar å få inn på ordninga.

Miljøvernsjef Jane Nilsen Aalhus fortel at folk har mange spørsmål om piggdekkgebyret.

– Folk lurer blant anna på om du må betala dersom du berre skal køyra gjennom Stavanger. Reglane fortel at det er Stavanger kommune sine grenser som gjeld for kven som må betala, forklarer Aalhus.

• LES OGSÅ: NAF mener piggdekkavgift er løftebrud
• LES OGSÅ: NAF: Vil heller ha retur av piggdekk enn avgift

Mål om 90 prosent piggfridel

Det er utfordringar med luftkvaliteten som er bakgrunnen for piggdekkgebyret i Stavanger.

Erfaringane frå Oslo og Bergen, som har hatt piggdekkgebyr ei stund, viser at gebyret får ein effekt på piggdekkbruken. Oslo har i dag ein piggfridel på 88 prosent, mens Bergen har 87. I Stavanger viser dei siste tala frå Vegdirektoratet, før ordninga er innført, ein piggfridel på 74 prosent.

– Målet vårt nå er ein piggfridel på 85–90 prosent i Stavanger, seier Aalhus.

Miljøvernsjefen meiner dei har laga eit effektivt betalingssystem, og viser til at du kan betala gebyret både via appar, nettsider og med Vipps (sjå faktaboks).

– I tillegg kan du betala på åtte forskjellige bensinstasjonar som ligg både innføre og utanfor Stavanger sine bygrenser. For reglane er slik at du skal betala før du køyrer inn i Stavanger.

– Køyr piggfritt

Er du framleis usikker på om du skal velja dekk med eller utan piggar, er rådet frå Stavanger dekksenter klart i snøfattige Stavanger.

– Mitt råd er å køyra piggfritt fordi då slepp du avgifter. Eg er ikkje i tvil om det.

– Sjølv dei som ofte skal til fjells?

– Dei som ofte skal på fjellet må vurdera om dei treng piggdekk for å komma seg heilt opp, eller om dei faktisk klarer seg med piggfrie dekk.