Fylkesrådmannen vil flytte ein halv skule

Dei veit kva administrasjonen i fylkeskommunen foreslår, men både elevar og tilsette på Bergeland vidaregåande skule i Tanke Svilandsgate i Stavanger, vil kjempa for skulen sin.

• Les også: Nå droppes karakterene i orden og oppførsel

Den har heilt spesielle kvalitetar, seier Ingebjørg Haughom, som går i tredje klasse, studiespesialisering.

– Lærarane er veldig nære elevane her. Dei sit i same kantina som elevane, og lærarromma har glasvegger og ligg nær klasseromma. Derfor er det lett å få tak i ein lærar når eg treng hjelp, fortel Haughom.

For få elevar

Det er lågare elevtal i Rogaland dei neste åra, som gjer at Bergeland vidaregåande, avdeling Tanke Svilandsgate, ligg utsett til. I tillegg held den til i leigde, og ikkje veldig gode, undervisingslokale.

Fylkesrådmannen foreslår derfor å leggje ned skuleavdelinga og spreie elevane på andre vidaregåande skular. Sola vidaregåande skule blir omtalt som ein av dei.

Eigen kultur

Det er om lag 250 elevar med framandspråkleg bakgrunn som går her. Til saman 47 forskjellige morsmål er representerte, og karakternivået frå ungdomsskulen er lågt for mange av elevane.

Derfor innførte skulen konsekvenspedagogikk som arbeidsmåte for nokre år sidan, og det har gitt resultat, fortel Håkon Moldøen, som er tillitsvald for Utdanningsforbundet.

– Det kom opp heile seks klassar i norskeksamen i fjor. Av dei var det berre ein elev som strauk, seier Moldøen.

Ny pedagogikk

Det er slutt på at elevane får orden- og åtferdskarakterar på Bergeland. Skulen ser på lærarar og elevar som likeverdige.

• Les også: Røykeforbud på skolen

– I staden legg me vekt på å forklara konsekvensen av handlingar som elevane gjer. Me grip tak i ting med det same og tar det opp gjennom samtalar, seier Herborg Løge, også ho er tillitsvald for Utdanningsforbundet.

Må vente i spaning

Det er politikarane i fylket som skal avgjere skjebnen til Bergeland, avdeling Tanke Svilandsgate.

Truleg blir dette klårt på Fylkestinget sitt møte i starten på desember.

Arta Sallabegolli går også i tredje klasse på studiespesialisering. Ho veit at skulen har gjort ein forskjell for mange elevar, og ho meiner at skulen bør få fortsetje.

– Fleire som har slite på andre skular, har kome hit og opplevd at dei har fått det betre til, seier ho.