– Det er ikkje bra dersom ein brukar ungane som plattform i ein diskusjon om surrogati og egg- og sæddonasjon. Det er ein debatt me vaksne og politikarar må ta først.
Ein tredel av alle grunnskular her i landet deltek denne veka i ein kampanje om mangfaldet av familietypar, i regi av organisasjonen Sex og politikk.
– Me veit at det er mange måtar ein familie kan vera sett saman på i dag. Det er ikkje lenger berre kjernefamiliar. Det er noko av det me har fokus på i vårt materiell, at det er mange måtar å vera ein familie på, seier kampanjeleiar Gry Stordal.
- LES OGSÅ:
– Vaksne må ta debatten først
Bollestad tykkjer at det er positivt at det blir sett fokus på familien i skulen.
– Det som kan vera bra med kampanjen er at det ikkje er lov å mobba nokon, uansett kva familie dei har. Eg er glad for at ein diskuterer familie. Ungar skal ikkje hengjast ut om dei ikkje veks opp i ein A4-familie, seier Bollestad.
Men ho er redd for at surrogati og sæd- og eggdonasjon kan koma på bana i klasseromma.
– Det er kontroversielt, og det er ikkje uproblematisk å ha dette med i lærestoff, fordi då brukar me ungane som ein arena for så vanskelege debattar, seier Bollestad.
Surrogati er ikkje lov i Noreg, men nokre vel likevel å gjera det i utlandet.
– Utfordrar lova
Ho er klar på at dette først må debatterast og avgjerast blant vaksne og politikarar.
– Dersom me tek så vanskelege debattar, og hoppar bukk over dei etiske diskusjonane, då trur eg at me taper som samfunn.
– Men kan denne kampanjen snakka om far far og mor mor, utan å vera borti desse etiske dilemma?
– Eg veit ikkje korleis dei gjer det, men det er problematisk om læreverk går ut over norsk lov.
– Det handlar om å skape mangfald
Stortingspolitikar Tina Bru (H) delar ikkje uroa til Bollestad.
– Eg tenkjar at dette opplegget er veldig bra. Eg meiner at me faktisk treng meir av denne type haldningsskapande arbeid inn i skulen, for me veit at me framleis har ein del utfordringar med å skape eit tolerant og mangfaldig samfunn, seier stortingspolitikaren.
Ho meiner at de då blir heilt naturleg at barn får lære om desse tinga på skulen.
