Invadert av «Trollpikk-trafikk»

– Bilar kjem køyrande i 70 og 80 kilometer i timen på denne smale vegen. Dei parkerer i gatene slik at dei vil hindra til dømes brannbilar å nå inn til oss som bur her ved ein eventuell brann, seier Ann Helen Mjølhus frå Mjølhus i Eigersund.

Både ho og naboane har fått kvardagen snudd på hovudet etter at steinen som dei alltid har kalla Tindapigen, eller tommelen, eller nasen, nå har blitt kjent over heile landet som «Trollpikken». I løpet av ein sommar har steinen gått frå omtrent null besøkande til godt over ti tusen.

• Les òg: Hærverk på Trollpikken gjorde den til verdskjendis

Dei fleste som skal opp til «Trollpikken» må passera like utanfor døra deira, og mange køyrer ifølgje naboane svin. Dei fryktar for barna sine og har sendt uromeldingar til Vegvesenet.

– Vegen er ikkje skikka

– Dette er ein einfeltsveg med møteplassar, som ikkje er heilt skikka til å ha store trafikkmengder, seier Trond Åge Langeland, som er senioringeniør i Statens vegvesen.

Dei har nå fått på plass ein trafikkteljar på Mjølhus for å få eit eksakt tal på kor mykje trafikk det er på vegen. Nå om hausten er det rundt helgene det er mest trafikk.

Etter eit møte med kommunen tysdag har Vegvesenet bestemt at dei vil føreslå fartshumpar ved husa. Dette er ei sak som må på høying hos kommunen og politiet før arbeidet kan ta til.

– Legg berre att drit

– Eg håper dei set ned farten, at dei gjer noko med sikta og at dei gjer møteplassane betre, seier Ann Helen Mjølhus. Dette er strakstiltaka ho meiner må på plass.

Naboen Odd Ståle Sørdal meiner kommunen kunne tent på å heller la turistane gå frå sentrumsparkeringsplassen som i dag er etablert for Vannbassengane i Egersund.

– Slik det er i dag er ikkje turistane innom Egersund sentrum. Dersom ein hadde sagt at dette skulle vera Trollpikk-parkeringa så hadde dei kanskje lagt att litt pengar i byen, slik det er nå legg dei berre att hundeposar med drit, seier Sørdal.

Ordførar Odd Stangeland i Eigersund seier dei i oktober skal halda eit ope møte der alle som vil kan koma med forslag til korleis Trollpikksatsinga til kommunen skal sjå ut framover.

– Denne attraksjonen var noko som kom litt brått på. Men det skal vera trygt å bu på Mjølhus, og me ønsker at grunneigarar og naboar skal sitja i førarsete for den vidare utviklinga av attraksjonen, seier han.

Oppdatering 20. september klokka 15.30: I den første versjonen av denne saka sto det at Vegvesenet meinte det var aktuelt å setja ned fartsgrensa. Det er ikkje riktig, og difor tatt vekk.