Det er tidleg morgon og høg aktivitet ved godsterminalen på Forus i Stavanger. 15 vogntog blir gjorde klar for ulike oppdrag langs vegane i Rogaland.
Ein heilt vanleg dag på jobben. Men ikkje for Mads Arild Helleberg Hamre.
Dette er nemleg hans aller første dag på jobb som yrkessjåfør.
– Kall det gjerne ein barndomsdraum. Alle har jo lyst til å køyre lastebil.
Det seier 33-åringen frå Tananger og smiler.
Helleberg Hamre er fersk i yrket, men likevel godt kjent med bransjen. Begge brørne hans er sjåførar, og sambuaren og nesten heile slekta hennar er i transportbransjen.
Samtidig har vegen til førarhuset vore lang og utfordrande den nytilsette sjåføren.
– Eg fullførte aldri skulen og har inga utdanning, og eg har derfor vore litt av og på med jobbing. I tillegg var eg 50 kilo tyngre og sleit med både rygg og kne. Etter ein slankeoperasjon forsvann plagene, men eg har likevel vore utan arbeid i 2,5 år, før eg vart tilsett her.
Fast jobb utan erfaring
I Noreg er behovet for yrkessjåførar så stort at fleire bedrifter vil tilsetje arbeidsledige utan kompetanse.
Helleberg Hamre er blant dei som no har vorte kursa til å bli yrkessjåfør.
– Vi vil understreke at det er gode sjåførar som slepp gjennom dette nålauget. Alle er gjennom grundig opplæring i bedrifter når dei er ferdig på sjåførskulen.
Det seier Reidar Retterholt, regionssjef i Norges Lastebileier-Forbund, Rogaland og Agder (NLF).
Prosjektet er eit samarbeid mellom Nav, fleire ulike transportfirma og Norges Lastebileier-Forbund, Rogaland og Agder (NLF).
Av rundt 60 påmelde fekk 20 personar tilbod om kurs, og på den måten har fleire komne seg ut i arbeidslivet.
Ut av arbeidsløysekøen
– Dette har forandra livet mitt.
Det seier Thomas Holmberg (35), som til liks med Helleberg Hamre også er fersk sjåfør for tungtransport.
Etter å ha teke kursa i regi av NFL og Nav har Holberg fått fast jobb som yrkessjåfør for Maksi Distribusjon.
– Eg bestod førarprøva i går, og det gir meg høvet til å sjå framover, fortel han.
– Dette løyser ikkje sjåførmangelen, men vi hjelper folk ut i jobb og samtidig får vi rekruttert inn nye.
Det seier Egil Torgersen som er dagleg leiar for Rennesøy Trafikk.
– Korleis er det å tilsetje folk som ikkje har køyrt lastebil før?
– Vi må byrje på scratch. Det er store og tunge bilar, og det forpliktar både med trafikktryggleik og handtering av gods. Vi bruker tid på opplæring etter at dei har fått lappen, svarer han.
Nav tek rekninga
Samarbeidde mellom NFL og Nav gjeld berre dei som av ulike årsaker står utanfor arbeidslivet.
Mange utan jobb viser no interesse.
– Det er stor pågang for å få dette tiltaket i Nav, seier Synnøve Schei, leiar for Nav Marked i Rogaland.
Nav Rogaland har til no betalt mellom 160.000 til 200.000 kroner for køyrebevisa til kvar enkelt deltakar på kurset.
Målet er at alle som får klasse C/CE (ekstern lenkje) skal få seg jobb etter at dei har fått sertifikat.
– Behovet for fleire yrkessjåførar er framleis stort, og NFL og Nav går no i gang med eit nytt kurs i Sør-Rogaland med oppstart til hausten, seier Schei.