– Det er spesielt. Det er jo vi som skal samle inn pengar til laget. Også må eigentleg foreldra gjere alt, seier Maiken Klovning Thorland (10).
Ho speler handball for Rival i Haugesund.
I haust selde dei bambussokkar til inntekt for klubben og laget.
Det vil seie.
Mamma la det ut på Facebook.
– Eg skreiv eit innlegg og selde veldig mange sokkar på ti minuttar. Dotter mi var med og leverte ut til naboar, men ho gjorde jo ikkje dugnaden sjølv, seier Anette Thorland som er mor og handballtrenar.
Men ho saknar tida då ungar ringde på med loddbok.
Viktig lærdom i barndommen
– Det er i større grad vi foreldre som gjer dugnaden nå. Og dei gongene ein får ungar på døra blir ein så sjarmert at ein kjøper for det er ikkje så ofte det skjer, seier ho.
Men både Maiken og venninna Malin Hovda (11) ønsker å ta større del i dugnaden. Dei trur at det er lærerikt.
– Foreldre og ungar bør gjere dugnad i lag, ikkje berre foreldra. Vi kan lære å vere sjølvstendige og aktive, seier jentene.
Psykolog og seniorforskar på Folkehelseinstituttet, Ragnhild Bang Nes, er einig med ungane.
– Ein føler gjerne at det er praktisk å legge ut sal av toalettpapir eller sokkar på sosiale medium når poden skal til Polen eller på korpstur. Det lettar jo oppgåva, men eg trur ungane taper på det ved at dei ikkje får vere med og tatt ansvar. Ein mistar moglegheita til å delta, tilføre verdi og lære seg nye ferdigheiter, seier ho.
Treng meir pengar enn før
Kombinert med tidsklemme har dei nye måtane å drive dugnad på komme for å bli.
Det kostar meir pengar nå enn før å drive med idrett, seier Pål Kristen Rønnevik, leiar i Noregs idrettsforbund digital.
– Det er kjappare for foreldre å bidra på den måten. Det kostar meir å vere ein del av idretten og dei nye inntektskonsepta gjer det mykje enklare og raskare for ein del foreldre, seier Rønnevik.
Men han har sjølv jobba dugnad då han var yngre. Og seier gjerne ja takk til begge deler.
– Eg er heilt einig i at vi mistar ein dimensjon. Då eg vaks opp hadde vi som lag ein dugnad der vi samarbeida om å løyse oppdrag for bedrifter og fekk pengar tilbake. Det hadde ein sosial effekt samtidig som det ansvarleggjorde oss, seier han.
Frivillige barn blir frivillige vaksne
Audun Fladmoe har tidlegare forska på betydninga av frivillig arbeid, og ifølgje han er det viktig at barn deltar.
– Forskinga tyder på at både det at ein sjølv har vore aktiv i foreiningsliv under oppveksten og at foreldra har vore aktive då ein var barn, har betydning for om ein sjølv fortset som frivillig når ein er vaksen, seier Fladmoe.
Neste gong handballaget til Anette Thorland arrangerer dugnad vil ho løyse det litt annleis.
– Eg likar jo at det er effektivt, men eg trur me foreldre kan vere meir bevisst og inkludere ungane meir. Når ein har publisert Facebook-innlegget står det framleis att pakking, utrekning og organisering. Så det er absolutt mogleg å ta ungane med, seier ho.