Olaus Trygve Bjuland er berre 17 år, men har drive med politikk sidan han var 13 år. Nå er han leiar for ungdomspartiet til KrF i Rogaland. Bjuland kjem frå Nærbø i Hå kommune.
– Eg har to foreldre med sterke meiningar, så det var heilt naturleg at eg blei politikar, seier han.
Ungdomskandidaten på kampplass
Med Sandnes KrF i spissen gjekk fleire utsendingar inn for å setje 24 år gamle Håkon Faarlund Hetland på tredjeplassen på fylkestingslista i staden for Bjuland. Han er student og jobbar for tida som trainee på Stortinget.
Dei som kjempa for Faarlund Hetland, meinte at Bjuland ville få fleire moglegheiter seinare.
I omvalet fekk Faarlund Hetland 50 stemmer, medan Bjuland fekk 47 stemmer.
Tolmodig toppkandidat
Solveig Ege Tengesdal toppar fylkestingslista til Rogaland KrF.
Foto: Ingvald Nordmark / NRKSolveig Ege Tengesdal frå Eigersund var foreslått på førsteplass av lista. Den plassen fekk ho utan diskusjon. For fire år sidan var også Ege Tengesdal med i kampen om topp-plasseringa, men måtte då gi plassen til Ellen Solheim.
Dette året snudde situasjonen seg. Solheim fekk ikkje støtte for å stå på førsteplassen, og trekte seg frå nominasjonskampen. Ege Tengesdal blei løna for måten ho takla dette på sist, og blei vald inn til ståande applaus.
Vidare ned på lista
På andreplassen kom Per Kåre Foss. Han kjem frå Sola og er 50 år. Han er leiar av Rogaland KrF for tida.
På fjerdeplass kom Gunn-Marit Lygre. Deretter Jan Gunnar Mattingsdal, Svanhild Løge Skålheim, Gustav Løge Fosse, Marit Brekke, Torbjørn Hovland og Oddny Helen Turøy på 10. plass.
Det var 98 utsendingar, som avgjorde nominasjonsmøtet til fylkestingsvalet for Rogaland KrF, tysdag ettermiddag.
Foto: Ingvald Nordmark / NRK
