– Oslo, Bergen, Ålesund, Trondheim.
Dagleg leiar i Stavanger flyttebyrå, Imtanan Malik, ramsar opp byane kor flyttebyrået oftast reiser med flyttelass til om dagen, utanfor sitt eige nærområde på Nord-Jæren.
Flyttebyråsjefen merkar at rogalendingar i aukande grad flyttar ut av Stavanger-regionen.
– Me har merka auka etterspørsel på oppdrag mellom Stavanger og andre byar, fortrinnsvis Oslo og Bergen.
– Er dette arbeidsledige?
– Det er ein blanding. Nokre er arbeidsledige og nokre har blitt flytta frå for eksempel eit avdelingskontor i Stavanger til hovudkontoret i ein annan by.
Fleire søker Nav om stønad til flytting
Også andre flyttebyrå NRK har vore i kontakt med i Stavanger-området merkar at arbeidsledige, både nordmenn og utlendingar, flyttar ut av Rogaland.
Og Nav har i lang tid oppfordra til nettopp dette. I fjor vår merka etaten at mange gjorde alvor av oppfordringane, og siste kvartal i fjor opplevde Stavanger ein historisk negativ folkevekst.
Nå merkar Nav Rogaland at fleire arbeidsledige også søker om stønad til flytting.
– Folk er veldig mykje meir interesserte i å flytta på seg og opne for stillingar andre plassar i landet. Det er også auka pågang på søknader til å dekka flytteutgifter, seier assisterande fylkesdirektør i NAV Rogaland, Anneline Teigen.
- LES OGSÅ:
- LES OGSÅ:
Trur ordningane er ukjente for mange
Ifølge Nav sine reglar (sjå faktaboks eller ekstern lenke) kan du få dekka flytteutgifter dersom du må flytta frå heimstaden din for å delta på arbeidsretta aktivitet eller skaffa jobb. Du kan også få dekka delar av reiseutgiftene dersom du må på jobbintervju ein annan plass i landet.
Dette er støtteordningar Teigen i Nav ikkje trur alle er klar over. Ho ber derfor dei som lurer på desse ordningane om å sjekka Nav sine nettsider.
– Det viktige er at folk får sjansar til å komma i arbeid. Folk ønsker å få jobb, folk ønsker ikkje å gå arbeidsledig.
Omsetningsvekst
Malik i Stavanger flyttebyrå seier det i aukande grad er arbeidsgivar eller Nav som betalar for flyttinga ut av Stavanger. Det kan komma godt med når det kan kosta 16-18.000 kroner for ein familie på to vaksne og to barn og flytta frå Stavanger til Oslo.
– Korleis viser den auka pågangen igjen på omsetninga til flyttebyrået ditt?
– Det viser så klart igjen. Stavanger flyttebyrå opplevde omsetningsvekst i 2016.