Færre fritidsbåtar på sjøen i sommar: – Me har lågare fart og bruker lenger tid

– Det er mykje mindre folk. Det er halvert frå i fjor, føler me. Det må jo vera prisane, seier Hogne Bertelsen, driftsleiar ved Vassøy Bunkringsstasjon.

Men det er ikkje berre Bertelsen i Stavanger som har mindre å gjere enn han brukar å ha om sommaren. NRK har vore i kontakt med gjestehamner over heile landet.

Hamnene er spreidde over heile landet, frå Troms og Finnmark til svenskegrensa. Dei fleste seier det same: Det er færre fritidsbåtar på sjøen i sommar samanlikna med i fjor.

Folk vurderer å kvitte seg med båten fordi dei ikkje har råd, ifølgje ei gjestehamn. Dei største motorbåtane er ikkje ute i sommar, melder ei anna. For det meste seglbåtar, ifølgje ein tredje.

Felles for gjestehamnene med lågare besøk er at dei trur på ei forklaring: høgare dieselpris.

Lågare fart og lenger tid

Båteigarane merker dei høge prisane, og det påverkar turvalet. For Roy Sætre og Per Sævik stoppar turen i Ryfylke.

– Det blir ein kortare tur enn planlagt. Å reisa til Sørlandet med desse prisane er tungt, fortel Sætre.

Likevel er det ikkje nok til å leggja båtferien på is.

– Me har båt, og det er det me ferierer i. Me må rett og slett betala prisen. Det blir lågare fart, me bruker lenger tid, men me koser oss i båten likevel, fortel Sævik.

Også Ryfylke Friluftsråd, som mellom anna tømmer avfallet i området, merkar det. Halvtomme søppelspann tyder på at det er mindre aktivitet på hamnestadene enn vanleg. Det er ikkje så mykje søppel å finna.

– Me ser ein tendens til færre båtar og at dei går saktare, fortel Hans Olav Sandvoll, dagleg leiar i Ryfylke Friluftsråd.

Dobbelt så dyrt som i fjor

Han trur også dei høge dieselprisane har skulda.

– Det er nærliggjande å tru at diesel- og bensinprisar speler ein rolle. At folk utnyttar dieselen dei har så godt som mogleg, meiner han.

Bertelsen ved Vassøy Bunkringsstasjon har lite trafikk om dagen.

Sidan sist sommar har prisane vorte dobbelt så høge, ifølgje Bertelsen. Det er ikkje bra for verksemda hans. Han tener nemleg meir når prisane er låge, for då har han fleire kundar.

– Fiskarane må jo òg liggja i ro. Det er billigare å vera heime, seier han.