– Eg ville ikkje inn i Forsvaret i det heile, men vart så motivert at eg aldri vurderte å avbryte.
20 år gamle Hanne Dahlby frå Moss er i Sjøforsvaret i Madlaleiren i Stavanger. Etter enda førstegongsteneste, heldt ho like godt fram karrieren i militæret.
– Eg vart heilt frelst over korleis militæret fungerte heilt frå sesjonen av, seier ho.
Det har vore ei utfordring at mange ungdommar droppar ut av militæret. For åtte år sidan hoppa 3500 soldatar av. Rundt ein tredel av dei som vart kalla inn. I fjor avbraut berre 500 soldatar førstegongstenesta.
Tungt arbeid
– Eg forstår at nokon kan synast at militæret er veldig tungt, i alle fall dei første vekene. Sjølv har eg alltid hatt lyst til å komme inn i Forsvaret.
19 år gamle Thomas Thalberg Johannesen har fått ein tomannslugar i kaserne D. I skapet heng ulike uniformer på rekke og rad. Ullsokkane ligg i system.
Under den åtte veker lange rekruttperioden skal 19-åringen få våpen- og soldatopplæring, og dessutan lære seg stridsteknikk. Deretter blir han, som alle andre, plassert i ei av dei ulike avdelingane i Sjøforsvaret. Der kjem han til å vere dei neste ti månadene.
– Eg trur det blir eit bra år, fordi ein får gode rutinar, haldningar og mange fine vennskapar, seier den nybakte rekrutten.
Merksemd på trivsel
Forsvaret har no gjort fleire grep for å halde talet på avhopparar lågt.
– Vi har ei meir individuell vurdering, gjennom fleire steg. Og vi har tilgang til meir informasjon om den enkelte, ifølgje Petter Lysholm, sjef for vernepliktsavdelinga i Forsvaret.
Motivasjon har vorte sentralt. Det er særleg i starten, både på sesjon og når soldatane er komne inn på rekruttskulen, at dei prøver å motivere ungdommane.
– Vi fokuserer på trivsel, motivasjon, kvalitet, og det å gå ei meiningsfylt teneste, seier Ronny Kristoffersen, sjef ved KNM Harald Haarfagre, der Noregs største rekruttskule ligg.
Prest, psykolog og legar er òg tilgjengelege for rekruttane som har behov for det.
Dei dyktigaste i verneplikta får tilbod om å halde fram militærkarrieren som tilsette. Eit tilbod Hanne Dahlby frå Moss takka ja til. Ho er no hjelpeinstruktør for tropp 3.
– Eg er opptatt av å ha eit ope forhold til rekruttane. Det er viktig å snakke om korleis dei har det, samtidig som vi leier dei, seier 20-åringen.
Sjå TV-serien Førstegangstjenesten her: