Elon Musk i Stavanger: – Vi treng meir olje og gass, ikkje mindre

– Eg trur på tillit og gjennomsiktigheit, sa Elon Musk.

Slik opna han sin tale på energimessa ONS i Stavanger i dag.

Frå talarstolen understrekar han, trass i å ha blitt verdas rikaste mann mellom anna ved å selje elbilar, at han ikkje trur oljealderen er over.

– Eg trur vi nett no treng meir olje og gass, ikkje mindre.

Likevel er han klar på at ein må byrje bevege seg vekk frå det å vere avhengig av ikkje-fornybar energi.

Musk var glad for å høyre statsminister Jonas Gahr Støre, som var på talarstolen før han, prate om Noreg si satsing på havvind.

– Det er eit massivt, utappa potensial i det, sa Musk.

Medan Musk var på scenen, blei presseområdet på ONS evakuert. Det er aksjonistar som har utløyst brannalarmen.

Meiner fornybar energi er ein risiko

Musk er kjend som ein eksentrisk riking.

Frå å produsere flammekastarar berre for gøy, å lage biltunnelar med parkeringsheisar til å skape aksjekaos ved å gjere heilomvending om Twitter-kjøp – han overraskar og skaper overskrifter.

Difor fekk han under talen spørsmål om han var glad i å ta risikoar, då med tanke på hans engasjement for elektrifisering av transport.

– Nokre ting er risikable, men om det som står på spel er viktig nok, so tek du den risikoen, sa Musk.

Xenia Wickett, som leia samtalen med Tesla-gründeren, spurde om risikoen ved å satse på nye energikjelder er verd det.

– Det mest risikable ville vore å ikkje handle, svarar han.

Takksam for norsk elbil-støtte

Ukrainas president Volodymyr Zelenskyj, kronprins Haakon og statsminister Jonas Gahr Støre står alle på talarlista når ONS 2022 opnar i Stavanger i dag.

Ved sidan av Zelenskyj er nok Musk personlegdommen på programmet som vekker mest oppstyr.

– Eg kom hit i takksemd for det norske folk si støtte til elektriske køyretøy. Så eg vil seie takk til det norske folk for dykkar støtte til berekraftig transport gjennom mange år, sa han då han kom til messeområdet.

Han trekk fram Noreg som eit føregangsland, då to av tre nye bilar er elektriske. California i USA vil forby salet av fossile bilar i 2035. Det same gjer Storbritannia fem år etter det.

Musk meiner alt dette tydeleg peikar på at verda vil satse på fornybare energikjelder framover.

– Det er klart at jordas befolkning har bestemt seg.

Musk sa at han vil snakke om energiverda i framtida medan han er i Noreg:

– Eg trur eg skal svare på nokre spørsmål og sette fram nokre idear for overgangen til ein berekraftig energiverd. Men som eg sa: Grunnen til at eg er her, er i takksemd for det norske folk si støtte til elektriske køyretøy. Så tusen takk for det.

Musk sitt selskap Tesla produserer fleire av dei mest populære nye bilane nordmenn kjøper. I fjor vart det kjøpt over 20.000 Tesla-bilar i Noreg.

Kan ikkje droppe olje og gass – enno

Messa han deltek på har opphavleg vore ei rein olje- og gassmesse, men nå er ho ei energimesse. Musk meiner vi framleis treng olje og gass – på kort sikt.

– Elles vil sivilisasjonen smuldre opp. Eg trur kvar ein oppegåande person vil konkludere med det, sa han.

– Bør Noreg utforske meir?

– Eg trur det er naudsynt med noko utforsking nå. Og samstundes fortsette støtta til overgangen til elektriske køyretøy. Eg lurer på om det er mogleg for Noreg å kanskje produsere meir kraft frå vatn og vind og kanskje eksportere det til Sør-Europa.

Musk snakka også om moglegheitene som ligg i vinden i Nordsjøen, og at vindkraft kan bli lagra i batteri som blir kraftressursar om vinteren.

Ifølge ONS-sjef Leif Johan Sevland er det også blant utstillarane nå eit mykje større fokus på fornybar energi, enn det var sist gong ONS blei arrangert for fire år sidan.