Etne og Vindafjord er «blodraude»

– Me er absolutt i ein utbrotskommune, og me er absolutt blodraude, seier fungerande ordførar i Vindafjord Tove Elise Madland.

Kommunen hennar, og nabokommunen Etne, på fylkesgrensa mellom Rogaland og Vestland, er nå to av kommunane i landet med flest smitta per innbyggar. Og i dag kom det første koronarelaterte dødsfallet i Vindafjord.

– Det er alvorleg. No er det viktig at kommunane gjer skikkeleg smittesporing, har god testkapasitet og skaffar seg eit oversyn, seier Preben Aavitsland, som er overlege ved Folkehelseinstituttet.

Idrettslaga har stengt ned

Kommunane med relativt få innbyggjarar har nå stengt sjukeheimar og omsorgssenter for besøkande, skular og barnehagar blir drifta på gult og raudt nivå og fleire store bedrifter er ramma.

• Les òg: Slakteriet og verftet ramma av smitte

– Erfaring viser at det kan lønna seg å slå hardt til med ein gong, og heller ha dei strenge tiltaka i kort tid, seier Aavitsland frå FHI.

I tillegg har også idrettslaga har stengt ned all aktivitet, etter tilråding frå kommunane. Fleire hundre barn er ramma.

– I ein situasjon som denne gjer me det me kan. Men me veit jo at idretten er viktig for barna våre, så vi har sett i gang ei undersøking, for å kartleggja kva dette betyr for den enkelte, seier Siv Iren Børve Heddeland, som er leiar i Ølen idrettslag.

Ho har sjølv fått påvist koronasmitte, og sit nå i isolasjon i heimen sin.

Tiltaket er eit strengare enn det som gjeld i Oslo, der barn i barneskulealder kan driva breiddeidrett.

– Dramatisk høge tal

Dei siste 14 dagane har om lag 80 personar blitt smitta i dei to nabokommunane.

42 av dei er i Etne som har det høgaste smittetalet per innbyggjar.

– Vi har ikkje klart å slå ned smittetilfella. Det kjem nye positive prøver kvar dag og smittetalet er dramatisk høgt i forhold til folketalet, seier Mette Heidi Bergsvåg Ekrheim som er ordførar i Etne.

Dei har likevel nå kjent smitteveg på dei fleste tilfella. Dessutan rosar ho innbyggarane sin innsats.

– Folk er veldig flinke til å etterleva tiltaka. Dei held seg heime og held avstand når dei er ute. Folk er flinke til å ha få nærkontaktar, seier ho.

Også Aavitsland i FHI har tru på at dei vil klara dette.

– Det krevst store ressursar i ein periode, men erfaringa frå mange andre kommunar er at stoda snøgt kjemt under kontroll når ein gjer de retta tinga. Vi er klare til å rettleie viss det trengst, seier han.