Dette er verdas beste utkikkspunkt

I den nylanserte Lonely Planet boka «Lonely Planet's 1000 Ultimate Sights» blir Preikestolen kåra til verdas beste utkikkspunkt.

• Les òg: Fem «magasug-topper» i Norge
• Les òg: Norges flotteste utsiktspunkt

Boka er full av topp ti lister med alt frå vulkanar til dei mest underhaldande paradane.

Det er i kategorien utkikkspunkt at den stupbratte fjellkanten i Lysefjorden har lagt kjende turistattraksjonar som Victoria Falls i Afrika og Grand Canyon i Nord-Amerika bak seg.

– Ser oss nok blinde på det me har

– Dette er veldig bra. Det er alltid kjekt med merksemd rundt naturen, seier Ole Tom Guse som er ordførar i Forsand kommune.

Han seier at kåringa som Aftenbladet skriv om i dag kom som ei overrasking på han:

– Sjølv ser me oss nok blinde på det me har. Eg trudde ikkje me kunne vinna sidan det finst så mange andre bra utkikkspunkt i verda, seier han.

Også på reiselivssenteret Lysefjordsenteret på Oanes gler dei seg.

– Dette er veldig flott! Dette sett verkeleg Lysefjorden på verdskartet, seier dagleg leiar Inger Maria Johannessen.

Håper turistane får augo opp for heile fjorden

Kvar dag får ho e-postar frå turistar som har spørsmål om korleis dei skal koma seg til Preikestolen. Nå håper ho at turistane kan få auga opp for heile Lysefjorden og ikkje berre Preikestolen.

– Kvart år kjem over hundre tusen personar for å sjå Preikestolen, det er mykje anna flott å sjå her, seier Johannessen.

• Les òg: – Taggaren må ha hatt gode nerver

Ordføraren trur på si side ikkje at kåringa får den store marknadsføringseffekten, sidan Preikestolen allereie er så godt kjent.

– Dessutan er det nok bloggar, YouTube, Twitter og andre slike nettstader som i dag har den største marknadsverdien for oss, seier Guse.