Dette er Birkedal-saka

Tysdag startar den mykje omtalte Trond Birkedal-saka i Stavanger tingrett. I saka, som skal halda fram til fredag, kjem ni fornærma til å forklara seg om det dei har opplevd som seksuelle krenkingar frå Birkedal i perioden frå 2006 til 2011. Ein periode då Birkedal var ein svært lovande politikar.

• Les òg: Birkedal på topp i Stavanger

Han var medlem av sentralstyret til Framstegspartiet og hadde i mange år leia ungdomspartiet FpU. 2011 var året då han skulle bli ordførar i heimbyen sin Stavanger.

Men slik gjekk det ikkje. For 20. mars, eit halvt år før valet, kom politiet på døra hans og tok han med i arresten.

Nektar straffskuld for det mest alvorlege

Birkedal var sikta for utuktig åtferd, han skulle mellom anna ha snikfilma unge menn i dusjen. I ti dagar blir han sitjande i varetekt med besøk og brevforbod. Siktinga blir utvida til og også omfatta seksuell omgang og seksuell handling med mindreårige gutar.

Då tiltalen blei tatt ut i desember, står saka oppført med ti fornærma. Dei fleste av desse med tilknyting til FpU, der Birkedal var leiar frå 2002 til 2008.

• Les òg: Har tatt ut tiltale mot Birkedal
• Nett-TV: Sjå Trond Birkedal på "Viggo på lørdag"

Av fem tiltalepunkt nektar den tidlegare ordførarkandidaten til Frp i Stavanger for to. Dette er dei mest alvorlege punkta, som handlar om seksuelt overgrep, og seksuell handling mot mindreårige.

Han nektar også for eitt av tilfella, som går på å ha lokka ein sekstenåring til å ha kledd seg naken framføre webkamera, med å bruka sin falske nettidentitet «Mona».

• Les òg: Dette er «Mona» – Trond Birkedal sin falske nettidentitet

Tar opp fag

Trond Birkedal byrja tidleg i politikken og har ikkje høgare utdanning enn vidaregåande skule.

Etter han trakk seg frå politikken, og medan han har venta på at rettssaka skulle byrja, har han tatt opp fag på Universitetet i Stavanger. Den røynde politikaren har byrja på ei bachelorgrad i statsvitskap.

Han har også fortalt til media at han har skrive beklagingsbrev til alle han har snikfilma.

I bladet Plot stod han i oktober fram som homofil. Der hevda han at han aldri ville gjort det han gjorde om han hadde vore open om legninga si.

• Les òg: – Ikke en «komme-ut-historie» til etterfølgelse

Partiet med i rettssaka

Når rettssaka nå byrjar står mellom anna tidlegare generalsekretær i Frp, Geir Mo, på vitnelista.

Årsaka er Dagbladet sine avsløringar om at leiinga i partiet kjende til påstandar om at Birkedal hadde forgripe seg på eit 15 år gamalt medlem av partiet, utan å gå til politiet.

Leiinga skal ha fått vita om dette i oktober 2009, altså lenge før politiet blei kopla inn i saka.

• Les òg: Fremskrittspartiet skjerper reglene i overgrepssaker

– Truleg fengselsstraff

Forsvarar til Birkedal, Arvid Sjødin, er innstilt på at Birkedal i alle høver vil bli dømt til fengsel.

Men dersom han blir frifunnen for tiltalepunkt ein og to, meiner han at det kan bli fengselsstraff med villkår.

Etter det NRK erfarer kan han få ei straff på omlag eit og eit halvt år fengsel dersom han blir dømt for seksuelt overgrep på den 15 år gamle guten.

– Kva tenker Birkedal om saka som byrjar tysdag?

– Han ønskjer å bli ferdig med saka så fort som råd. Han er klar for å ta straffa si, seier Sjødin til NRK.no.