Slik vil Bryne FK bruka Haaland-millionane

Når det regnar på Dortmund, dryp det også på Bryne FK og Molde.

Det er dei norske klubbane Haaland har spelt for. Dei får høvesvis 1,6 og 1 prosent av kjøpesummen. Dette er såkalla solidaritetsmidlar.

Overgangssummen er ikkje bekrefta, men ifølgje fleire aviser, deriblant Bild, blir Haaland seld til City for 75 millionar euro (750 millionar kroner) på grunn av ein avtalt klausul i kontrakten med Dortmund.

For moderklubben Bryne FK utgjer dette om lag tolv millionar kroner.

Ein sum som er langt frå ubetydeleg for ein klubb som er i sportsleg krise (null poeng etter seks kampar i 1. divisjon) og har eit stadionanlegg som kanskje har sett sine beste dagar.

Ein tredel av budsjettet

– For oss utgjer desse pengane om lag ein tredel av det totale budsjettet vårt, seier ein godt nøgd dagleg leiar Hans Øyvind Sagen i Bryne FK.

Han er ikkje i tvil om kva pengane i første omgang bør gå til.

– Me må oppgradera anlegget vårt, slik at det blir betre vilkår både for bredde- og elitefotballen, slår han fast.

Han trekk fram stadion generelt, ståtribunane spesielt og grasmatta, som noko av det han ønsker å få gjort noko med.

Slutten for naturgras?

Det betyr at Haaland-pengane kan bety slutten for naturgraset på hovudbanen. Ei sak som vekker kjensler i klubben på Jæren, der bønder i årevis har lagt stoltheit i å få graset til å gro.

Sagen meiner det er viktigare omsyn å ta.

– Med ein grasbane som berre kan nyttast til A-laget går me glipp av mange verdifulle treningstimar for breiddefotballen, seier han.

Vidare forklarer Sagen at klubben ønsker å investera pengane på ein måte som kan generera fleire Haaland-inntekter på sikt.

Vil ha opplevingssenter

– Ein ting me har snakka om er eit Haaland-opplevingssenter, forklarer han.

Korleis eit slikt senter skal vera kan han ikkje seia så mykje om ennå, men han minner om at Bryne er i ein ganske unik situasjon med å ha fostra opp ein så god spelar som Erling Braut Haaland.

I Bryne sentrum har det alt byrja å visa att at dette er heimstaden til den store fotballstjerna. Gatekunstnaren Pøbel er i gang med eit svært Haaland-kunstverk, og litt nord for sentrum er Kjetil Barane i gang med ein Haaland-statue.

Sagen viser også til Haaland- «dryleveggen» som allereie er under oppføring, samt at klubben ønsker å satsa på andre Haaland-produkt.

Sjølv om A-laget til Bryne ligg på jumboplass på tabellen, avviser Sagen at Haaland-pengar skal gå til spelarkjøp.

– For oss er det viktig at dette går til langsiktige investeringar. Spelarkjøp ligg allereie inne i budsjettet, avsluttar Sagen.