Braut rutinane under ferjedrama i Lysefjorden

– Me må skjerpa vår eigne rutinar etter denne hendinga, seier Stephen Sollid, klinikksjef i Helse Stavanger.

To personar måtte få legetilsyn, men ingen blei alvorleg skadd då turistferja MF «Eid» fekk motorhavari og kraftig røykutvikling i Lysefjorden i Forsand fredag kveld 17. august.

NRK har fått tilgang til AMK sin varslingslogg. Den viser at prosedyrane kun blei følgde i starten.

– Normalt sett skulle bakvaktslegen blitt varsla samtidig med Sandnes legevakt. Dessverre blei ikkje det gjort i dette tilfellet. Det beklagar me sterkt, seier Sollid.

To personar enda på legevakta i Strand kommune. Det er nærmaste legevakt. Men sidan havariet skjedde i Forsand kommune, skulle dei eigentleg ha reist over fjorden – til legevakta i Sandnes, som Forsand har legevaktsamarbeid med.

Men slik blei det ikkje sidan politiet sende dei til legevakta på Jørpeland i Strand. Hendinga har fått Strand-ordføraren til å stilla spørsmål ved legevaktsamarbeidet til nabokommunen.

Forsand-legen blei ikkje varsla først

Sandnes legevakt blei varsla av AMK klokka 20.31 på kvelden. Det er ein time og fire minutt før bakvaktslegen på Forsand, som blei varsla 21.35 på kvelden.

– Det beklagar me sterkt, seier Sollid.

Han seier avgjerda er «litt typisk» når store hendingar skjer, med fleire redningsetatar involvert.

– Desse avgjerdene går ofte litt på tvers av det som er normalprosedyrar. I dette tilfellet det som er i avtalen mellom Forsand og Sandnes.

Lovar å skjerpa rutinane

Ifølge klinikksjefen fekk ikkje varslingsglippen noko å seia for hjelpa dei to pasientane fekk.

– Men det kunne fått noko å seia for pasientflyten dersom Forsand-legen hadde vore med tidlegare og kunne vore med på planlegginga av kor pasientane skulle sendast. I dette tilfellet blei nok avgjerda tatt av innsatsleiinga i politiet på staden.

Om dette betyr at pasientane hadde blitt sende til legevakta i Sandnes, dersom bakvaktslegen i Forsand hadde blitt varsla tidlegare, vil ikkje klinikksjefen spekulera i.

– Er det grunn for helseføretaket til å sjå nærmare på samarbeidslinjene etter dette?

– Samarbeidet og dialogen med kommunane og legevaktene i distriktet er god, men me må skjerpa vår eigne rutinar etter denne hendinga. Me må vera nøye med å varsla dei legane som skal varslast.

Lege i bakvakt 24 timar i døgnet

Forsand-ordførar Bjarte Dagestad (H) er einig i at Helse Stavanger nå må gå gjennom sine varslingsrutinar.

Han er også opptatt av å formidla til sine innbyggarar at kommunen har ei legebakvaktsordning som gjeld 24 timar i døgnet.

– Me stod klar med lege, men legen blei ikkje kalla ut av AMK. Eg vil understreka at me har lege i bakvakt på denne sida av fjorden, uavhengig av ferja. Og legekontoret vårt er fullt utstyrt.