– Eg følte eg måtte ta sats for kvart innpust, fortel Erlend Kvinnesland frå Karmøy i Rogaland.
Bonden skulle berre hente kraftfôr til dyra då ulukka skjedde ein ettermiddag like før jul i fjor.
Dei 800 kilo tunge kraftfôrsekkane som var stabla i høgda, byrja å røra på seg. Men grunna støy frå firhjulingen hans, merka ikkje Kvinnesland det i tide.
– Eg blei fanga før eg rakk å reagere. Den trefte meg litt uheldig.
Han blei slengt i bakken av sekken, som trefte han mellom hovudet og nakken. I fire og ein halv time låg bonden i klem på det kalde betonggolvet.
– Eg tok i det eg klarte, men sekken ville ikkje rikka seg. Eg følte berre det blei tettare og tettare rundt hovudet, fortel bonden.
Trudde det var slutten
Kvinnesland var ute og arbeidde, og hadde med seg tre av hundane sine. Mens han låg der forsvann den eine hunden etter den andre, men Bella blei verande hos matfar.
– Det er vanskeleg å seia kva som gjekk føre seg inne i hovudet hennar, men ho forstod at det var noko som ikkje stemde.
Bonden låg fastklemd på golvet, utan å vite om redninga var nær.
– Eg tenkte alle moglege tankar. På eit tidspunkt trudde eg at dette var slutten, fortel Kvinnesland.
Då tida byrja å renne frå han, skjedde det som ingen hadde trudd var mogleg.
Det var ein usannsynleg redningsaksjon på trappene.
Tre gode hjelparar
Men korleis skulle Bella redda matfar? Redninga var nærare enn først venta.
Galopperande nedover grusvegen starta Bella jakta på hjelp.
– Hunden til Erlend kom springande mot meg. Ho bjeffa høgt, fortel Kvinneslands nærmaste nabo, Ida Jo Haaland.
Ho sto i vegkanten, og reagerte på måten Bella oppførte seg på.
– Bella reiv og sleit i nokre plastbitar like ved meg. Det var akkurat som om ho ville fortelja noko.
Utan å skjønna heilt kva det var Bella prøvde å kommunisere, så tok Haaland affære.
Ho lirka mobilen ut av lomma, søkte opp kona til bonden, Hilde Elin Kvinnesland, og sende ei melding:
«Har ein av hundane rømd?»
Kort tid etter fekk ho svar.
Såg faren ligga nedkjølt på betonggolvet
Hilde Elin og dotter Astrid var på veg heim i bil, då meldinga frå naboen tikka inn.
Mens mora parkera bilen i tunet, sprang Astrid for å sjekke kva faren heldt på med.
På betonggolvet låg bonden med ein 800 kilo tung sekk over seg.
– Det var ikkje eit kjekt syn, fortel Astrid Kvinnesland.
Ho tenkte raskt, og greip fatt i den første kniven ho såg.
– Eg kutta fleire store hol i sekken, slik at fôret skulle renna ut.
Kraftig nedkjølt og redusert blei han redda av hunden Bella, ein snarrådig nabo og dottera.
Rekordlågt tal på dødsulykker
Denne historia kunne enda på verst tenkeleg måte, men det enda godt på familiegarden på Karmøy. I 2017 var det berre tre dødsulykker i landbruket i Noreg.
Ifølge Arbeidstilsynet er det historisk låge tal.
Kvinnesland slapp skrekken med ei natt på sjukehus før han fekk komma heim igjen.
– Eg søv god om natta og føler meg sterk i kroppen, fortel han.
To månader etter den skjebnesvangre dagen på garden er Erlend Kvinnesland tilbake i arbeid, og ved godt mot.
– Det har vore terapi for meg å komma tilbake i arbeid. Det blei ein lykkeleg slutt, avsluttar bonden.