Bli med på arkeologanes første djupdykk

Tysdag starta nemleg tidenes første arkeologiske undersøking av havbotnen i Stavanger.

I føremiddag dykka arkeologane ned i hamna, og den neste månaden skal store område bli undersøkt.

– Her håpar me å finna spor etter kor hamna har vore før. Det kan vera båtar som har vore til oppankring eller som har lossa der ute. Dei kan ha kasta ut gamle koke- eller steikekar, det kan vera lær etter lærarbeidet og er me skikkeleg heldige finn me ein gammal utrangert båt som har sokke ein plass der ute, seier marinarkeolog Arild Skjæveland entusiastisk.

• LES OGSÅ: Dette funnet kan gjøre Stavanger eldre
• LES OGSÅ: Stavanger kan være 100 år eldre, men rapporten lar vente på seg

– Veldig spanande

Han kommuniserer med dykkarkollegaen 17 meter under oss, der me sit i ein gummibåt utanfor Holmen i Stavanger sentrum og lurer på kva ein kan drøyma om å finna der nede.

– Dette blir veldig spanande, kommenterer Skjæveland.

Stavanger kommune tenker tanken om fleire bustadar og fleire arbeidsplassar på Holmen. Men ein kan ikkje starta med den typen utbygging utan å ta med seg historia.

– Då må me ut i sjøen og vita om det er arkeologiske forhold me må ta omsyn til, seier prosjektleiar i Stavanger kommune, Tor Brynjar Welander.

• LES OGSÅ: Havbunnen utenfor Stavanger skal undersøkes

Ti år frå plan til gjennomføring

Han håpar kommunen får eit godt avgjerdsgrunnlag til å kunne gå vidare med planane.

– Kor langt fram i tid tenker du det vil sjå totalt annleis ut her?

– Det kan ta noko tid, spesielt i område kor me skal gjera mange kompliserte ting slik som i ei utfylling som dette. Ofte tar det gjerne ti års tid frå ein planlegg på dette nivået til ting blir gjennomført.

Det var flest bildekk, og lite keramikk å finna på havbotnen tysdag. Men nå skal arkeologane jobba under vatn ut februar månad. Dersom det dukkar opp noko spanande, blir det presentert på Stavanger maritime museum.