«Det var slag, banking, alt saman»

– Det var slag, banking, alt saman, seier Bawi til NRK.no.

17-åringen fortel om kva som møtte han då han var ny i Egersund. Fire personar kom frå ein bil, spurde kva han heitte og svarte med å gi han skikkeleg juling.

– Dei slo meg i fjeset og brakk høgrearmen min, fortel den burmesiske flyktningen.

Rapport avdekkjer rasisme

Bawi er ein av 120 burmesiske flyktningar som bur i rogalandsbyen. Og han er langt frå den einaste som har opplevd rasisme.

Ein rapport Telemarksforsking har gjort på oppdrag av Eigersund kommune viser at innvandrarungdom i Eigersund opplever rasisme.

Dette er med å øydelegga integreringa som både kommunen og frivillige organisasjonar arbeider med, fortel rapporten.

Les òg: Antirasisme skal inn i skolen

Sjokkert varaordførar

Varaordførar Unn Therese Omdal (Ap) er sjokkert over kapittelet som omhandlar rasisme i rapporten.

– Dette er alvorleg. Me politikarar har ansvar for å snakka om dette og diskutera korleis ein kan forandra haldningane.

– Samstundes har skulane og barnehagane eit ansvar. Dei gjer ein god jobb, men me klarer ikkje å nå ut til alle, seier varaordføraren.

(Artikkelen held fram under bilete.)

Kan tilgi

Bawi Hrin høyrer til Chin kyrkjelyden i Egersund, der dei burmesiske flyktningane samlast kvar søndag. Talsmann James Hrang håpar sonen på seks år skal sleppa å oppleva rasistisk mobbing.

– Ja, det håpar eg. Sonen min er fødd i Stavanger, men skal begynna på skule her i Egersund.

Bawi Hrin fortel at det er mykje rasisme og fordommar blant dei unge. Sjølv vel han å sjå framover.

– Eg var redd, men kan tilgi dei som gjorde vondt mot meg, seier han.