– Skikkeleg gjennombrot for Ålgårdbanen

Ålgårdbanen, altså togstrekket mellom Ganddal og Ålgård, blei lagt ned på 50-talet.

I dag er skjenegangen i delvis elendig tilstand, men fleire har i mange år ivra for å få nytt liv i den 11,9 kilometer lange jernbanestrekningen.

I fjor sommar kasta Kongeparken seg på i debatten og tok til orde for å gjenopna togbanen til Ålgård. Frå før er det tverrpolitisk ønske i Gjesdal om å opna banen.

I dag gjekk altså ein samrøystes transportkomite på Stortinget inn for å greia ut Ålgårdbanen saman med ei utviding av Jærbanen sørover på Jæren. Det betyr at moglegheitene for ein samankopling mellom Ålgårdbanen og Jærbanen nå skal utgreiast.

– Dette er eit skikkeleg gjennombrot for Ålgårdbanen, og ein utruleg bra dag. Når transportbudsjettet blir behandla i Stortinget på torsdag, så vil eit samrøystes Storting gå inn for dette, seier Eirin Sund.

Ap: – Bra for miljøet

Ho er trygg på at utgreiingane vil visa at det er liv laga for å kopla samane Ålgårdbanen med Jærbanen.

– Eg trur utgreiingane vil visa at dette er bra for å skapa ein god bu- arbeidsmarknadsregion og at det er bra for miljøet, seier Sund.

Sund poengterer at ein ny bane mellom Ganddal og Ålgård vil kosta ein del pengar, men at det er vegen å gå for at folk skal kunna velja kollektivt framfor bilen i regionen.

Venstre: – Kjempesiger

Venstre føreslo gjenopninga av Ålgårdbanen i sin alternative transportplan (NTP) i 2013. Då forslaget kom opp i Stortinget juni same år var det berre Venstre som stemte for banen.

Fylkesleiar i Rogaland, Kjartan Alexander Lunde, karakteriserer det som ein kjempesiger for Venstre at både Ålgårdbanen og dobbeltsporutviding på Jærbanen blir sett på under eitt.

– Det mykje som tyder på at dette banealternativet blir løfta fram gjennom auka fokus og at det blir sett på dagsorden. Banen ligg i eit område der me treng eit kollektivtilbod for å ta unna den framtidige trafikkveksten.

Jernbaneverket har tidlegare sagt at opning av Ålgårdbanen truleg ligg godt over 15 år fram i tid. Årsaka er at Jernbaneverket meiner 600.000 potensielle reisande i året er for lite.