Statsvitar Svei Tuastad ved Universitetet i Stavanger sa i dag til NRK at kommunereforma kan bety slutten for dei lokalt forankra bygdelistene, og slå dårleg ut for det politiske engasjementet i bygdene. Han viser til erfaringar frå Danmark der politisk engasjement har gått ned etter kommunesamanslåinga.
– Mindre nærleik til politikarane kan vera ein demokratisk kostnad ved kommunereforma, seier Tuastad.
- Les og sjå kart:
Alt for mange politikarar
Næringa ønsker seg større kommunar, og kastar seg inn i debatten.
– Slik situasjonen er nå, har me ei overflod av lokalpolitikarar og kommunar, seier administrerande direktør i Næringsforeningen i Stavanger-regionen, Harald Minge.
Han viser til Nord-Jæren, der seks ordførarar og seks rådmenn saman med meir enn 200 kommunepolitikarar, nå styrer eit område som er omtrent like stort som Bergen kommune, men som har mindre innbyggarar.
– Men i Bergen klarar dei seg med litt over 60 kommunepolitikarar, og eg har aldri sett nokon gå i demonstrasjonstog på Torgallmenningen på grunn av mangel på demokrati, seier Minge.
Han meiner tvert imot at småkommunar med svært mange politikarar er problem for demokratiet.
– Det er ein større fare for eit demokrati-underskot dersom talet på kommunar held seg på same nivå. For det me ser i dag er at kommunar seier frå seg makt gjennom interkommunale samarbeid. Samstundes ser me at store og små kommunar i større grad er utsett for nasjonal detaljstyring.
– Og kven er det som har behov for å møta politikarane i det daglege, spør han retorisk.
Godt fungerande kommunar
Om Hå, Time og Klepp bør bli ein Jærkommune vil ikkje Minge uttala seg om.
– Dette er veldig velfungerande kommunar, men faktumet er at ein kommunereform er på gang, og me veit at kommunane på Jæren er i dialog. Ingen skal teikna opp dette kartet nå, men eg trur Jæren blir eit regionalt kraftsenter i større grad dersom det blir samanslåing.
Næringsforeininga har tidlegare bedd IRIS sjå på kommunestrukturen si betydning for næringslivet i Stavanger-regionen, her blei det konkludert at rammevillkåra for næringslivet er svekka med dagens struktur.