– Han kunne blitt ein «dritgod» langrennsløpar

– Det er sjølvsagt umogleg å seia kor god langrennsløpar Henrik Ingebrigtsen kunne blitt. Men han har eit unikt konkurranseinstinkt og ei toppidrettshaldning få andre har, seier langrennskommentator i NRK, Jann Post.

Dette gjer kommentatoren sikker på at Ingebrigtsen kunne blitt ein «rimeleg god» langrennsløpar – dersom han hadde bestemt seg for det.

– Om han hadde blitt verdas beste som Petter Northug, eller nummer 10, er vanskeleg å seia. Men rimeleg god hadde han klart å blitt med den innstillinga og det fysiske talentet han har, meiner Post.

Hjelmeseth: – Han gjorde eit rett val

Det var i eit portrettintervju med NRK (les heile portrettet her) Henrik Ingebrigtsen sa at han kunne vore heilt i verdstoppen i langrenn – dersom han hadde valt ski framfor friidrett.

Ingebrigtsen var ein lovande langrennsløpar i tenåra og vann NM-gull i 10 km fristil som 17-åring i 2008.

Også langrennsekspert i TV2, og tidlegare klassisk-spesialist i langrennssporet, Odd-Bjørn Hjelmeset, trur Ingebrigtsen kunne sanka medaljar for skilandslaget.

– Han har jo eit NM-gull som junior, så det er klart han kunne blitt ein «dritgod» langrennsløpar. Men personleg trur eg han gjorde det beste då han valde friidrett. Og norsk friidrett treng Henrik sine kvalitetar, meiner TV2-eksperten.

Hjelmeseth påpeikar også at det ikkje er lett å samanlikna friidrett med langrenn.

– Det er ingen logikk i at dersom du er kanongod til å springa, blir du ein god langrennsløpar. Det er ikkje alltid det heng i hop. Det er mange som meg som strevde med å bli god i skøyting, men som berre fekk til klassisk.

Skiforbundet: – Talent får god oppfølging

I intervjuet med NRK kjem også Ingebrigtsen med eit stikk til Norges Skiforbund som ikkje tok kontakt etter NM-gullet han tok som 17-åring.

I ein e-post til NRK skriv kommunikasjonssjef i Skiforbundet, Espen Graff, at dei ikkje kontaktar førsteårsjuniorar basert på resultat, men at me har tradisjon i Norge for at skitalent får god oppfølging i klubbar og krets.

– Når utøvarane blir eldre og er etablerte på juniornivå har forbundet ei tettare oppfølging, skriv Graff.

Heller ikkje Odd-Bjørn Hjelmeset blei kontakta av skiforbundet som 17-åring, og meiner det Ingebrigtsen opplevde ikkje er uvanleg.

– Norges Skiforbund er ekstremt flinke til å følgja opp talenta sine. Det blir jobba enormt bra både i kretsane og i forbundet, meiner han.

Trur dei fekk med seg NM-triumfen

Jann Post synst det er vanskeleg å svara på om Skiforbundet burde oppdaga talentet til Ingebrigtsen.

– Eg er heilt sikker på at forbundet og folka rundt juniorlandslaget fekk med seg NM-triumfen hans som 17-åring. Men han var ikkje eingong seeda i løpet og det tyder på at resten av sesongen ikkje var så bra. Målt opp mot andre var han nok ikkje god nok for juniorlandslaget.

Det kan ha vore uheldig for Ingebrigtsen, meiner Post.

– Kanskje var det viktigare for Henrik enn andre å koma med på juniorlandslaget i og med at han budde i Sandnes, ein by kor skiforholda ikkje er dei beste.