Frå 1. juli forenklar regjeringa byggereglane, og då kan ein bygga både garasjar, uthus, buer og balkongar utan å søka kommunen om det.
Men det betyr likevel ikkje at det er fritt fram, åtvarar byggebransjen. Helge Ramsfjell er marknadssjef i AF Bygg Rogaland, og seier regelendringane byr på mange utfordringar.
– Du får utfordringar med naboar, du får utfordringar med at folk bygg meir enn det dei eigentleg har lov til, og du får problem med at folk ikkje har kontroll på reguleringsplanar, seier Ramsfjell.
– Viktig å søka informasjon
Ramsfjell trur ikkje kvardagen blir betre med det nye regelverket. Han synst det berre er greitt at det tar litt tid å behandla byggesaker i dag – og at nokon passar på. Han minner også om at byggekrava gjeld som før etter 1. juli.
– Det er mykje som framleis ikkje er lovleg. Reglane burde vore slik dei er, for nå er det mange som kjem til å bygga ulovleg, seier Ramsfjell.
Kommunane og styresmaktene jobbar nå med å gjera informasjon tilgjengeleg for folk som skal bygga med det forenkla regelverket. Byggesakssjef i Sandnes kommune, Mette Brox, påpeikar at det er du som set i gang bygginga som er ansvarleg for at det skjer i tråd med gjeldande lovar og kommuneplanar.
– Det viktigaste er at dei søker informasjon og sjekkar ut reguleringsbestemmingar. Fokuset nå har vore veldig på at ting skal bli unntatt søknadsplikt, så det eg er uroleg for er at folk berre går i gang utan å sjølv sjekka opp i at føresetnadene er på plass, seier Brox.
- Les òg:
- Les òg:
Sjå video:
Her kan du få innføring i dei nye reglane av kommunalminister Jan Tore Sanner.
