– Då fem mann gjekk inn for å sjekka eksploderte det

– Ingen folk var inne i lokala under sjølve kappinga, men då dei skulle inn for å sjekka så eksploderte det, seier Johnny Johnsen som er innsatsleiar i politiet.

Ulukka skjedde i titida måndag ettermiddag, og tre av dei skadde ligg på Haukeland Universitetssjukehus i Bergen med alvorlege skadar.

• Les òg: – Dei tilsette har gjort ein kjempeinnsats

Prislønt kutteutstyr

Kuttemaskinen som var under testing då ulukka skjedde var ein såkalla «Control Cutter» stadfestar leiinga i Malm Orstad til NRK.no.

Dette er ifølgje Teknisk Ukeblad eit prislønt kutteutstyr som har kome i etterkant av Bourbon Dolphine ulukka i 2007 der åtte menneske omkom, og skulle bli installert for test på fartøyet Skandi Vega i haust.

Kutteutstyret skal i løpet av to sekund vera i stand til å kutta over tjukke ankerkjettingar og vaierar i situasjonar der det kan unnverja ei ulukke, skriv Control Cutter på heimesidene sine.

Tidlegare i år vann oppfinninga til andreplass i DNB NOR sin innovasjonskonkurranse. Ifølgje TU blei prototypen DNV-godkjent i mai 2010.

–Me har vore i kontakt med alle me må vera i kontakt med, men førebels har det ikkje kome fram opplysningar om kvifor testinga gjekk gale, seier Bjørnar Huru i Malm Orstad på spørsmål om dei har vore i kontakt med leverandøren av Control Cutter.

• Les òg: – Ein tragisk dag
• Les òg: Tåka forsinket transport av skadde

Blant dei skadde var også tilsette frå Control Cutter som var på plass for å testa utstyret saman med dei tilsette i Malm Orstad.

Vil ikkje spekulera i årsak

Kva som gjekk gale då firmaet i Klepp skulle testa kutteutstyret er framleis usikkert. Men ut frå omfanget av dagens ulukke kan det vera snakk om ein gasseksplosjon:

– Me veit at høgt trykk og ulike typar gass kan vera årsaka til eksplosjonar, men eg vil ikkje spekulera i kva som er årsaka i denne ulukka, seier brannsjef Henry Ove Berg i Brannvesenet Sør-Rogaland til NRK.no.

Eit av elementa i kuttereidskapen varmar stålet i kjettingen opp med såkalla induktiv oppvarming til over 900 grader skriv TU.

Kriminalteknikarar vil halda fram arbeidet sitt på ulukkesstaden i morgon opplyser politiet.

– Tung beskjed å få

Selskapet der testinga gjekk føre seg lar etterforskinga konkludera med kva som gjekk gale:

– Nå har me fokus på dei som arbeidar her, og familiane til dei skadde. Årsaka til ulukka kjem i andre rekke, seier Magne Orstad som er dagleg leiar i Malm Orstad.

Han var sjølv i Sveits då ulukka skjedde, men sette seg på første fly tilbake til Norge då han fekk beskjeden.

– Det var ein svært tung beskjed å få. I morgon skal me ha infomøte med alle arbeidarane, så får me sjå korleis arbeidsdagen blir vidare, seier Orstad.